Pisalem 34:3-22

³Hagadele ina di aamua o Dimaadua madalia au, gidaadou gi buni mai gi di gowaa e dahi e hagaamu dono ingoo!

⁴Au gu dalodalo gi Dimaadua, gei Mee gu hila mai gi di au. Mee gu hagamehede au gi daha mo ogu mmaadagu huogodoo.

⁵Digau ala e manawa gee gaa mmada gi Mee ga manawa lamalia. Digaula hagalee manawa gee labelaa.

⁶Digau ala nadau hagamaamaa ai, ga gahigahi a Mee, gei Mee e hila ang gi digaula. Mee e haga dagaloaha digaula gi daha mo nadau haingadaa huogodoo.

⁷Dana dangada di langi e hagaloohi digau ala e hagalabagau a Dimaadua, ge e daa digaula gi daha mo nia mee balua.

⁸Goodou tei gii bida halahala ina be Dimaadua le e humalia behee. E maluagina go tangada dela guu gida dono hagaloohi i baahi o Mee.

⁹Goodou ala go ana daangada huogodoo, hagalaamua ina a Dimaadua. Digau ala e hagalongo gi Mee, le e hai mee gi nia mee ala e hiihai ginai digaula.

¹⁰Nia laion hogi le e hiigai idimaa nadau meegai ai, gei digau ala e hagalongo ang gi Dimaadua la gaa dohu i nadau mee humalia huogodoo.

¹¹Ogu ihoo hagaaloho damagiigi, lloomoi hagalongo mai gi di au, gei au ga aago goodou gi di hai dela e hagalaamua a Dimaadua.

¹²Goodou e hiihai e manawa lamalia i lodo godou mouli? Goodou e hiihai gi mouli waalooloo mo di tenetene?

¹³Malaa, goodou hudee helekai huaidu ge hudee helekai tilikai.

¹⁴Maaliu mai gi daha mo nia hai mee huaidu, heia go nia mee ala e humalia. Haga mahi dadaahia hua beelaa di noho baba aga i godou manawa hagatau.

¹⁵Dimaadua le e madamada humalia i digau ala e donu, ge e hagalongo gi nia dangidangi digaula.

¹⁶Gei Mee e hai baahi gi digau ala e hai nia mee huaidu. Digaula ma gaa mmade, gei tangada e langahia digaula ai.

¹⁷Digau ala e hai nia mee donu ma ga dangidangi gi Dimaadua, gei Mee e hagalongo, Mee e daa digaula gi daha mo nadau haingadaa huogodoo.

¹⁸Dimaadua le e noho i baahi digau ala gu manawa paagege, Mee e haga dagaloaha digau ala gu deai nadau hagadagadagagee ai.

¹⁹Digau humalia le e tale ginai nia haingadaa e logo, gei Dimaadua e haga dagaloaha digaula gi daha mo nia maa huogodoo.

²⁰Dimaadua e benebene digaula hagahumalia, di iwi e mooho i nia iwi digaula ai.

²¹Di mee huaidu le e daaligi tangada huaidu, gei digau ala e hudi nadau wou gi digau ala e donu, le e hagaduadua.

²²Dimaadua le e haga dagaloaha ana daangada, gei digau ala e hula gi Mee bolo gi hagaloohia ginaadou la ga mouli.