Tingtoeng 34:3-22

³BOEIPA te kai neh pomsang uh sih lamtah a ming te tun pomsang uh sih.

⁴BOEIPA te ka tlap vaengah kai n'doo tih ka rhihnahkoi boeih lamloh kai n'huul.

⁵BOEIPA te a paelki vaengah hlampan uh tih a maelhmai tal uh pawh.

⁶Mangdaeng loh a khue te khaw BOEIPA loh a yaak dongah citcai boeih lamkah anih te a khang.

⁷Amah aka rhih rhoek kah kaepvai ah BOEIPA kah puencawn te rhaeh tih amih te a pumcum sak.

⁸Ten lamtah BOEIPA then tila hmuh lah. Amah dongah aka ying hlang tah a yoethen.

⁹Amah aka rhih rhoek ham tah a tloelnah a om pawt dongah a hlang cim rhoek loh BOEIPA te rhih uh lah.

¹⁰Sathuengca rhoek loh vawtthoek tih lamlum cakhaw BOEIPA aka tlap rhoek ham hnothen pakhat khaw vaitah uh mahpawh.

¹¹Camoe rhoek halo uh. Kai ol he ya uh lah. BOEIPA hinyahnah te nangmih kan cang puei eh.

¹²Khohnin then hmuh ham aka lungnah tih hingnah dongah aka omtoem hlang te ulae?

¹³Na lai te a thae lamkah, na ka te thailatnah aka thui lamloh rhalrhing lah.

¹⁴A thae te nong tak lamtah hnothen te saii lah. Rhoepnah te tlap lamtah anih te hloem lah.

¹⁵Hlang dueng rhoek soah BOEIPA mik om tih amih kah a pang uh te a hna a kaeng.

¹⁶Thae aka saii rhoek te diklai kah poekkoepnah lamkah khoe ham BOEIPA loh a hmai a thuh.

¹⁷Hlang dueng rhoek a pang uh vaengah BOEIPA loh a yaak tih amamih kah citcai boeih lamkah amih te a huul.

¹⁸Lungbuei aka rhek taengah BOEIPA a yoei pah tih mueihla aka hnipdik te a khang.

¹⁹Hlang dueng kah yoethae he yet dae yoethae khui boeih lamkah anih te BOEIPA loh a huul.

²⁰Anih kah a rhuh boeih a ngaithuen pah dongah pakhat khaw paep mahpawh.

²¹Halang te boethae loh a duek sak vetih, hlang dueng aka hmuhuet te boe ni.

²²A sal rhoek kah a hinglu te BOEIPA loh a lat tih amah dongah aka ying boeih tah boe uh mahpawh.