Sale 34:3-22

³Tada Bada ta kasaḡesaḡe, tada tai ḡemotida bi Bada isana ta lauduneye.

⁴Tagu Bada lisinemo e laupali bi egu pali i waimune, bi bai e nainailedina lisidimo i wai yawasanigu.

⁵Tedi mabai a nuwavitaledi Bada lisinemo sagu aubaina, ba sai nuwavisu gulata bi tana laḡan matabuna ya sagusagudi.

⁶Tagu e wainuwatoitoi bi e laupali te Bada egu pali i vaiye, bi kauwa gebogebodimo i waiyawasanigu.

⁷Tedi mabai Bada sa vivivilena ba ena aneya, sa kitakita galamedi bi sa labelabe kauwedi.

⁸Taunana aubaina ko nuwavitala Bada lisinemo bi ena laukivivisuvisu ko banavi, bamoda ko nawana lisinemo sagu aubaina ba koi nuwavisu gulata.

⁹Temi lava waiwaisumeḡimi Bada ko vivile. Bi lava mabai Bada sa vivivilena mote bai ḡesau sima maluwabiye.

¹⁰Wali saugemo ba laiyon sa maluwabi bi kani sa peki, bi geḡa te Bada tauwaisumaḡena tedi mote bai sima maluwabiye.

¹¹Egu lava ko nato bi egu gagali ko vaiye. Yai lovelovemi te Bada ko vivile.

¹²Bamoda aiyai miya wailofa kwa ḡoena, ba yawasana visuvisuna kwa vai.

¹³Bi lava mote kuma giu wai gebogebodi bi mote kumai kaikaiyovu.

¹⁴Gebogebo kauwedimo kwa nuwavitala, bi visu kwa voiye, kwa ḡailisi te lava kwa sagudi bi nuwaubamo kwa miya.

¹⁵Bada didimana lavedi ya kitekitedi, laḡannemo tana lisinemo sa laupalina ba ya sagudi.

¹⁶Lavedi gebogebo tauvoiyena ba Bada ya miyatautauliyedi, bi a pekina ba mote aiyai ima noḡoti munaḡedi.

¹⁷Laḡannemo Bada ena lava lisinemo sagu sai baḡaena ba ya vaiyedi, bi edi pilipilimo ya kuvesidi.

¹⁸Tana lava nuwa kulukuluvidi diyedimo, bi edi sumaḡa yovoyovodi ba ya sagudi.

¹⁹Lava didimanina pilipili wapewapedi ya banabanavidi, bi geḡa te pilipilidi nopodimo Bada ya sagusagu.

²⁰Tana siliḡena matabudi ya labelabe kauwedi, te mote sima doukoto.

²¹Bi gebogebo lavedi ba edi gebogebo ya vunu munaḡedi, tedi mabai lava didimanina sa dabodabokena ba kovoḡa sa vai.

²²Bada ena taupaula yai yawasanidi. Lava mabai Bada lisinemo sagu sa waibaḡayena ba ya moito galamedi te mote kovoḡa sima vai.