Pisalem 33:9-22

⁹Mee ne helekai, gei henuailala guu gila. Mee ne helekai hua, gei nia mee huogodoo gu kila aga.

¹⁰Dimaadua e haga dee kila nia hagataele o nia henua, ga haga mmaa gi daha nia hagabaubau digaula.

¹¹Gei ana hagabaubau e noho hua beelaa. Nia hagataele a Maa ang gi dono hiihai le e noho hua beelaa.

¹²E maluagina go tenua dela di nadau God la go Dimaadua. E maluagina go nia daangada ala guu hili go Mee bolo e hai ana daangada!

¹³Dimaadua e mmada iha i di langi, e daumada gidaadou go nia daangada huogodoo.

¹⁴Mee e daumada digau huogodoo ala e noho i henuailala mai i dono lohongo aamua.

¹⁵Ma go Mee dela e hai nia daangada gii mee di hagabaubau, gei Mee e iloo Ia nia mee huogodoo ala e hai go digaula.

¹⁶Di king la hagalee aali mai i ana gau dauwa ala e maaloo. Tangada dauwa la hagalee aali mai i dono maaloo.

¹⁷Nia hoodo ala i tauwa la hagalee hai ana mee gi di aali, nia maaloo digaula le e deemee di hagamouli ginaadou.

¹⁸Dimaadua e hagaloohi digau ala e hagalongo ang gi de Ia, digau ala e hagadagadagagee gi dono manawa aloho dee modu.

¹⁹Mee e haga dagaloaha digaula gi daha mo di made. Mee e hagamouli digaula i lodo tau magamaga.

²⁰Dimaadua la go tadau hagadagadagagee, go Mee go tadau hagaloohi mo tadau hagamaamaa.

²¹Gidaadou e tenetene mai i Mee. Gidaadou e hagadagadagagee gi dono ingoo dabu.

²²Meenei Dimaadua, do manawa aloho dee modu gii noho i madau baahi, i gimaadou ala e hagadagadagagee hua adu gi di Goe.