SALMOS 33:9-22

⁹Pampa nochi cati yaya quiijto, ya nopa mochijqui. Huan cati yaya tanahuati ma eli, ya nopa monexti.

¹⁰TOTECO quinsosolhuilía inintalnamiquilis masehualme ipan campa hueli talme para amo ma quichihuaca cati fiero moilhuijtoque. San tailpitzas huan quincuapolos talme para amo huelise quichihuase cati fiero quisencajtoque quichihuase.

¹¹Pero cati TOTECO moilhuijtoc quichihuas amo quema mopatas. Cati ya quinequi, ya nopa elis para nochipa.

¹²Paquij masehualme ipan nopa tali cati motemachíaj ipan TOTECO. Quena, nelía paquij nopa masehualme cati TOTECO quintapejpenijtoc para iaxcahua.

¹³TOTECO cati itztoc nepa ilhuicac techhualtachilijtoc nochi timasehualme.

¹⁴Hasta nepa ipan ilhuicac TOTECO techtachilijtoc cati tiitztoque ipan ni taltipacti.

¹⁵Yaya TOTECO cati quichijchijqui toyolo nochi titaltipac ehuani huan quitachilía nochi cati tijchijtinemij.

¹⁶Se hueyi tanahuatijquet amo tatani pampa quinpiya miyac isoldados. Yon se soldado cati motemaca amo tatani pampa quipiya miyac fuerza.

¹⁷Amo ximotemachi ipan se cahuayo para mitzmanahuis masque nelía tetic. San ica ifuerza amo hueli temanahuía.

¹⁸Pero TOTECO, quena, yaya nochipa techtachilijtoc tojuanti cati tiquimacasij tiquixpanose. Techmocuitahuía cati timochiyaj ipan itaicnelilis.

¹⁹Techmanahuía quema tiitztoque nechca miquilisti. Huan techtamacas quema oncas mayanti para noja ma tiitztoca.

²⁰Tojuanti ipan toyolo timotemachíaj ipan TOTECO. Yaya techpalehuía huan techmanahuía ten cati amo cuali.

²¹Yeca ma tiyolpaquica ipan TOTECO, pampa timoneltemachijtoque ipan yaya cati nelía tatzejtzeloltic.

²²TOTECO, xijpiya moyolo ica tojuanti, pampa san ipan ta timochiyaj.