Pisalem 21:2-7

²Goe guu wanga gi mee nia mee a mee ala e haa manawa ai. Goe gu helekai gi tangidangi a maa.

³Goe gu hanimoi gi mee mo au hagamaluagina humalia, gaa wanga dau hau goolo gi hongo di libogo o maa.

⁴Mee ne dangi adu gi di Goe di mouli, gei Goe guu wanga gi mee di mouli duai ge waalooloo.

⁵Nia madamada o dono ingoo le e aamua, idimaa Goe dela gu hagamaamaa a mee. Goe ne hai a mee gii hai di king e dau gei e mahi.

⁶O hagamaluagina le e madalia a mee ga hana hua deeodi. Mee e tenetene huoloo idimaa Goe dela e madalia a mee.

⁷Di king le e hagadagadagagee gi Dimaadua di Gowaa Aamua, gei mee gaa noho baba mau dangihi, idimaa go di manawa aloho dee modu Dimaadua i mee.