Pisalem 143:2-9

²Goe hudee hagi aga ina au, go dau dangada hai hegau, idimaa ma tangada e donu i oo mua ai.

³Ogu hagadaumee guu kumi au gu hagamagedaa. Digaula guu dugu au gi lodo di hale galabudi bouli dongoeho, au guu hai gadoo be tangada guu made i mua loo.

⁴Ogu lodo gu bagege, gei au gu de nnoomaalia huoloo.

⁵Au e langahia nia laangi ala ne too gi daha. Au e hagabaubau i au mee huogodoo ala ne hai, ge e hagalangahia mai gi di au au mee huogodoo ala ne hai.

⁶Au e daahi aga ogu lima gi nua e dalodalo adu gi di Goe. Dogu hiihai huoloo adu gi di Goe le e hai gadoo be nia gelegele maangoo ala e hiihai huoloo gi di uwa.

⁷Meenei Dimaadua, helekai mai gi di au dolomeenei! Au gu dogu hagadagadagagee ai, Goe hudee hagammuni ina Goe i di au, gi dee hana hua au madalia digau ala e hula gi lala gi tenua o digau mmade.

⁸Hagalangahia ina mai gi di au i nia luada huogodoo di hai o do aloho deemodu, idimaa au e hagadagadagagee adu gi di Goe. Agu dalodalo e lloo aga gi di Goe. Hagia mai gi di au di ala dela belee haele iei au.

⁹Meenei Dimaadua, au e hanadu gi di Goe belee abaaba Kooe. Haga dagaloaha ina au gi daha mo ogu hagadaumee.