1Ŋoŋerao micne bapa juŋgopieŋ ŋoŋe no micne bapa âgo‐ŋeŋiczi dâŋ ŋazape. No Kristo e ʒâic fâro maname ʒâŋe fâri‐nanezi honepo, izi juku eri tatamac‐ticne fua tâcneme i wâc rauckepemu. Irec no hâcne dâŋ mu qâmoc eŋarepe mananiŋ:
2Anuture lama guru soŋaŋ‐jopaniŋte muŋarekicne, i jâiŋko mâcne, buafec jaha hone maiŋ ejarenʒepieŋ, erâ moneŋ mafa huhurere manasuhuc mâcne, giere buâkec eŋareha enʒepieŋ.
3Erâ wâc ŋicbomboŋ ejarehuc mâcne, lama micne bajarehuc miti hata bânie‐jarenʒepieŋ.
4Eme juku soŋaŋ sâkozi fisirâ hendiŋ huririnehec fofo sanaŋ i heŋareme hume rojuniŋmu.
5Ŋic socɋâri ŋoŋe iŋuc jaha ŋazakopac, ŋoŋe ŋic kâcɋene jaŋere wahamicne junʒepieŋ. Erâ mâmâc sasawa ine gie qoruc ʒâŋene maŋhuhuŋ i jomarâ kiŋaŋ qaqac enʒepieŋ. Manaŋgopieŋ, Anutu e ŋic maŋfefe jaŋe dope qatara‐jareekac â ŋic maŋhuhuŋ ine dope sicne‐jareekac.
6Anuture mesanaŋzi bâuruŋ‐ŋopame dapenʒepieŋ. Iŋuc epie juku dameŋ‐ticne maickeme ekizia bafaharec‐ŋopaocmu.
7Wiac mezac‐ŋopaekac sasawa i Anutu qârâriecnenʒepieŋ, eki sâcne hone jauŋ eŋareekac.
8Ŋoŋe maŋsowa juhuc rucgereŋ‐ŋeŋic banʒepieŋ. Râsi sâko‐ŋeŋic Sataŋ e oâ iŋucne erâ mic aŋkerâ e me e ɋâckepe muhuc ra fisi ware fisi ehuc juekac.
9Eme ŋoŋe mamanasiŋhec qiŋ herâ domahuc e hetapaickenʒepieŋ. Erâ ʒiŋuc mananʒepieŋ, âgofâc‐ŋeŋic mâreŋ sâc jaŋerao ʒâic fâro ijaha fua‐fârewec fokac.
10Erâ Anutu aki anonoc rune, e eri tatamac fofo sanaŋ focnekac, ira Kristore erâ fisiniŋte hefârec‐ŋopaweczi ʒâic fâro dameŋ bembeŋne manahapie bâtiec‐ŋopahuc âkesiŋ‐ŋopaocmu, erâ basanaŋ‐ŋopahuc keteŋ‐ŋopaocmu.
11Tâpiri i erao hâcne foweczi fohuc juocmu sanaŋ. Jâmbomac.
12No dâŋ i Siliwano âzâcnepe qâreŋke‐ŋarekac. No ere hâcne manape âgo fârine ekac. No bapa fuŋfuŋ jaha manapozi Anutu uruc jauŋ‐ticnere dâŋ bembeŋnea mutaniŋke‐ŋarerâ faŋ qaŋarehuc mukopac, dâŋ i fârine, maŋnao qiŋ herâ domanʒepieŋ.
13Babe haeonec kikefuŋ, nâŋâcnehec mâmâc rowosâec‐jopakicne, jaŋe manasu‐ŋareŋgopieŋ, erâ motec‐nane Mareko e mâmâc.
14Ŋoŋe mitio ââgo ehuc meo babac efârenʒepieŋ. Kristohec jueŋgopieŋ ŋoŋerao wama fofârezejec.
