Pesalem 9:4-17

⁴gebe aôm kômasaŋ aêŋoc biŋ to kômêtôc jagêdêŋ. Aôm-kômêtêc-gêdêŋwaga gôŋgôŋ lêpôŋ tau ŋaô.

⁵Aôm goec biŋ lau samuc to goseŋ alôb-alôbwaga su. Aôm goseŋ êsêacnêŋ ŋaê su gêjaŋa samucgeŋ.

⁶Aôm golo ŋacjo popoc e gacgeŋ maleŋmê baliŋgeŋ sêja. Aôm goseŋ malac gêwiŋ e ŋaê samob gêjaŋa.

⁷Apômtau oc êŋgôŋ nê lêpôŋ endeŋ tôŋgeŋ. Eŋ ketoc lêpôŋ kêkô gebe êmêtôc biŋ.

⁸Ŋac tageŋ tonaŋ tec kêmêtôc lau nomŋa nêŋ biŋ jagêdêŋ ma kêkêŋ ŋagêjô gêdêŋ tenteŋlatu gêjô gêŋ, taŋ sêgôm naŋ.

⁹Apômtau kêtu lau, taŋ sêôc gêŋwapac naŋ, nêŋ tuŋtêna. Eŋ kêtu tuŋtêna gebe êsêac sêŋgôŋ ŋalêlôm êndêŋ taŋ gêŋwapac êŋgôm êsêac naŋ.

¹⁰Amboac tonaŋ êsêac, taŋ sêjala aômnêm ŋaê naŋ, sêkêŋ mateŋ aôm. Aôm Apômtau tec gôwi êsêac, taŋ sesom aôm naŋ, siŋ atom.

¹¹Awem êôc Apômtau, taŋ gêŋgôŋ nê lêpôŋ gêŋgôŋ Sion naŋ, asôm ênê gêŋsêga lasê êndêŋ tenteŋlatu sêŋô,

¹²gebe eŋ taê gêjam gebe êkac êsêacnêŋ kamocgôc. Eŋ kêliŋ môêc, taŋ lau ŋasec sêmôêc gêdêŋ eŋ naŋ, siŋ atom.

¹³O Apômtau, taŋ kôkô aê auc gêdêŋ jamac êndu ŋasacgêdô naŋ, taêm labu aê. Ôlic aêmamaŋ gebe ŋoc ŋacjo sêgôm aê kwalecgoc.

¹⁴Aê gabe jasôm aômnêm gêŋ towae lasê samob. Jakô Sion latuo nê sacgêdô ma aoc êôc aôm toôndu, gebe gôjam aê sa.

¹⁵Lau samuc nêŋ sê, taŋ sêkwê kêtu aêŋa naŋ, êsêac tauŋ sêu tauŋ sêsêp. Tauŋ eŋkaiŋ gêwê uc, taŋ sêkic kelecgeŋ naŋ.

¹⁶Apômtau kêmêtôc biŋ gêwa tau sagac. Ŋac alôb-alôb gêwê tau lêma ŋalakô.

¹⁷Lau alôb-alôbwaga sêsêp lamboam sêja, ma lau samuc samob, taŋ sêliŋ Anôtô siŋ naŋ, amboac tonaŋgeŋ.