Pesalem 80:1-11

¹O Israelnêŋ ŋacgejob, taŋ gojob Josep kêtôm domba ŋatoŋ teŋ naŋ, ôkêŋ taŋam. Aôm taŋ gôŋgôŋ kerub ŋaô naŋ, oc taôm lasê

²êndêŋ Epraim agêc Benjamin ma Manase. Ôndi toŋaclai mêŋônam aêac sa.

³O Anôtô, ônam aêac sa êtiam. Ôkêŋ laŋômanô mêŋêpô aêac gebe ênam aêac sa.

⁴O Apômtau, lausiŋ undambêŋa nêŋ Anôtô, nêm lau teteŋ mec elêmê ma aôm gobe ôê têmtac ŋandaŋ tôŋ e êndêŋ ondocgeŋ.

⁵Aôm kôkêŋ êsêac seŋ mateŋsulu kêtu nêŋ mo. Aôm kôkêŋ êsêac sênôm mateŋsulu, taŋ kêsêp laclu e mêŋgêc naŋ.

⁶Aôm kôpô aêac siŋ e tenteŋlatu sêsu aêac susu ma aêacma ŋacjo sêômac aêac.

⁷O Lausiŋ undambêŋa nêŋ Apômtau, mêŋônam aêac sa êtiam. Ôkêŋ laŋômanô mêŋêpô aêac gebe ênam aêac sa.

⁸Aôm kôkip wainmôkê teŋ sa aŋga Aiguptu ma kôjanda lau samuc sêsa gebe ôsê êsêp êsêac maleŋ.

⁹Aôm kôwaka ŋagamêŋ sa ŋapep, tec ŋawakac keseleŋ ŋajam ma gêjam gamêŋ auc.

¹⁰Ka tau kêkêŋ ajuŋ lôc samob ma ŋalaka gêjam kaseda kapôêŋ auc.

¹¹Ka tau ketoc laka kêsa e jagêdêŋ gwêc ma ŋasêli kêpi e jagêdêŋ bu Euprat.