Pesalem 51:1-11

¹O Anôtô, taêm walô aê gebe aôm ŋac moasiŋ. Aôm taêm walô ŋatau kapôêŋ, onseŋ aêŋoc sec su.

²Ôkwasiŋ ŋoc tôp su ma ômbuŋ ŋoc geo su e jatu selec.

³Gebe aê tauc kajala ŋoc kesogac ma matoc gê ŋoc geo gedeŋ tôŋgeŋ.

⁴Aê gagôm sec gêdêŋ aôm taômgoc ma gagôm gêŋ, taŋ aôm gôlic gebe sec naŋ. Tec kômêtôc aê jagêdêŋ ma nêm mêtôc tau solop.

⁵Ojae, tinoc kêkêkam aê tobiŋgeŋ ma kêkôc aê tosecgeŋ.

⁶Aôm gobe biŋŋanô ênam ŋamalacnêŋ ŋalêlôm auc, amboac tonaŋ ôwa mêtê tokauc ŋabiŋ ŋalêlômŋa sa êndêŋ aê.

⁷Ônsêlô ŋoc geo su tomalageŋ gebe jatu selec. Ôkwasiŋ aê gebe ŋakêŋkêŋ laŋgwageŋ.

⁸Ôkêŋ aê jatu samuc to têtac ŋajam êsa ma ôlic, taŋ gôjac popoc naŋ, ôli êpi-êpi êtiam.

⁹Ônsaŋ laŋômanô auc êndêŋ ŋoc sec ma ômbuŋ aêŋoc geo samob su.

¹⁰O Anôtô, ôkêŋ ŋoc ŋalêlôm ŋawa êsa ma ôkêŋ ŋalau wakuc to ŋaŋêŋ teŋ êŋgôŋ ŋoc ŋalêlôm.

¹¹Ôtiŋ aê su aŋga laŋômnêm atom ma ôkôc nêm Ŋalau Dabuŋ su aŋga aê atom.