Pesalem 35:2-16

²Ôja lautuc to maluku sa ma ôndi mêŋônam aê samaŋ.

³Ôkôtêŋ kêm to ôndaiŋ olo endeŋ lau, taŋ sebe sê aê tôŋ naŋ. Ôsôm êndêŋ ŋoc katuc gebe “Aê tec gabe janam aôm sa.”

⁴Ôkêŋ lau, taŋ sesom lêŋ senseŋ aê suŋa naŋ, têtu meloc ma sêmbac tauŋ su. Êsêac taŋ sêkic aêŋoc biŋ naŋ, sênu tauŋ su tomajeŋgeŋ sêc sêmu sêna.

⁵Ôkêŋ êsêac têtôm jataê, taŋ mu kelelo naŋ, ma Apômtaunê aŋela êtiŋ êsêac su.

⁶Êsêacnêŋ intêna êtu kesec ma ŋalêŋô êsa ma Apômtaunê aŋela êjanda êsêac.

⁷Êsêac sêwa lakô aê kelecgeŋ ma sêkwê sê gebe aê janac tauc êndu.

⁸Gêŋwapac êtap êsêac sa eb tageŋmaŋ ma tauŋ sêsêp nêŋ lakô, taŋ sêwa kelecgeŋ naŋ, e gacgeŋ sênaŋa.

⁹Go ŋoc ŋalêlôm êtu samuc Apômtau ma êôc eŋ sa gebe gêjam aê kêsi.

¹⁰Aê oc jasôm toŋoc ŋalêlôm samucgeŋ gebe “Apômtau, asa oc êtôm aôm, taŋ kôjaŋgo ŋac gêŋgôŋ jageoŋa su aŋga ŋaclainê to kôjaŋgo ŋalêlôm sawa, taŋ gêôc gêŋwapac naŋ, su aŋga ŋac, taŋ kêkôniŋ eŋ tôŋ naŋ.”

¹¹Imbeleŋ dansaŋ sêsa gebe mêŋsenseŋ aê, têtu kênac gêŋ, taŋ gajam kauc ŋam naŋ, gêdêŋ aê.

¹²Aê kamoasiŋ êsêac, mago sêkêŋ sec gêjô ŋajam e aê katuc gêbac su.

¹³Mago gêdêŋ taŋ gêmac kêtap êsêac sa naŋ, aê kasô talu kêtu ŋoc ŋakwê. Aê gajam dabuŋ mo ma kateŋ ŋoc mec gasaŋ-laŋôcanô auc.

¹⁴Gagôm tauc amboac gagôm kêtu ŋoc ŋac me lasic teŋŋa. Gaŋgôŋ kapô gaducgeŋ katôm ŋac teŋ ŋalêlôm ŋawapac kêtu tênaŋa.

¹⁵Mago gêdêŋ taŋ aê katu sec naŋ, êsêac sêkac sa toôliŋ kêpigeŋ sebe sêsu aê susu. Ma lau, taŋ gajam kauc êsêac naŋ, sêsôm biŋ alôb-alôb kêpi aê gedeŋ tôŋgeŋ.

¹⁶Êsêac têtôm sêsu-susuwaga sêjam aê katu ôwê to sêgôm aê katu meloc ma sêmôêŋ luŋluŋ gêdêŋ aê.