Pesalem 35:17-28

¹⁷O Apômtau, gobe ôlic gêŋ tonaŋ e êndêŋ ondocgeŋ. Ôjanda katuc su aŋga êsêanêŋ biŋ alôb-alôb. Ônam aê kêsi aŋga lewe matac nêŋ.

¹⁸Go janam daŋge aôm êsêp taêsam sêkac tauŋ sa ŋalêlôm. Aoc êôc aôm êsêp lau taêsam ŋanô taŋeŋsuŋ.

¹⁹Ôkêŋ êsêac, taŋ sêkic aêŋoc biŋ sêsiŋgeŋ sêmoa naŋ, sêmajec aê atom. Ôkêŋ êsêac, taŋ sêkêŋ kisa aê ŋabiŋ masigeŋ naŋ, sêsênic mateŋ êtu aêŋa atom.

²⁰Êsêac sêsôm biŋ malô-malô atom. Ma sêgôliŋ biŋdansaŋ kêpi gamêŋ tau ŋalau wapac.

²¹Êsêac sêpa laweŋgeŋ kêtu aêŋa ma sêmôêc gebe “Kec, kec tauŋ mateŋ anô talic ŋanôgac.”

²²O Apômtau, aôm gôlicgac, amboac tonaŋ ônam taôm tôŋ atom. O Apômtau, ômoa jaêc aê atom.

²³Matam jali êsa to ôndi sa gebe ômansaŋ ŋoc biŋ êtu katô. O ŋoc Anôtô to ŋoc Apômtau, ônam gôliŋ ŋoc biŋmaŋ.

²⁴O Apômtau ŋoc Anôtô, aôm ŋac gêdêŋ. Ômêtôc ŋoc biŋ êtu katô gebe êsêac ôliŋ êpi atu aêŋa atom.

²⁵Ôkêŋ êsêac sêômac aê êtu biŋ, taŋ sêpuc boa gêc nêŋ ŋalêlôm naŋŋa atom gebe “Kec, gêŋ amboac tonaŋ tec aêac taêŋ gêjam.” Ôkêŋ êsêac sêkêli tauŋ gebe “Aêac aseŋ eŋ sugac” naŋ atom.

²⁶Ôkêŋ êsêac samob, taŋ ôliŋ kêpi kêtu ŋoc gêŋwapacŋa naŋ, majeŋ to môkêŋapac ŋawapac êsa acgom. Ôkêŋ êsêac, taŋ tetoc tauŋ sa gêdêŋ aê naŋ, têtu meloc ma majeŋ êkôm êsêac auc.

²⁷Ôkêŋ êsêac, taŋ sêlic aê ŋajam naŋ, tauŋ têntac ŋajam to ôliŋ êpigeŋ. Ma ôkêŋ êsêac sêsôm ênêc awêgeŋ gebe” Apômtau eŋ ŋac kapôêŋ. Eŋ taê gêjam nê sakiŋwaga gebe êmoa ŋajamgeŋ.”

²⁸Imbeloc oc êwaka nêm biŋgêdêŋ sa, êŋgôm waem êtu tapa endeŋ tôŋgeŋ.