Mboe 35:17-28

¹⁷Yooba, parei ta gedgeede zin mi tikamam mbulu tiŋgi pio? Zin kembei laion ta zoŋon zirzir be tiŋa kan buzur. Tana tatke yo pizin! Kokena tipasaana yo.

¹⁸Naso leleŋ ambai pu, mi aŋlup raama zin wal ku, mi aŋpakuru. Mi aŋwit urum isala kor ila iwal biibi matan.

¹⁹Iŋgi koŋ koi bizin tikam ŋoobo yo mi tiur koi pio sorok. Tana uulu yo lak! Kokena menmeen zin ma tiso tilip pio. Zin sombe tire yo, na matan repiili yo mi lelen ambai pa pataŋana ta aŋbaada i. Zem zin ma tikam mbulu tana pio mini pepe.

²⁰Sua kizin iswe kembei lelen be ziŋan zin tomtom tiparlup zin ma timbot ambai som. Pa tiŋgalŋgal sua pakaamŋan boozo pizin wal ambaimbaiŋan ta manneŋan i.

²¹Mi kalŋan izalla sorok mi tiso la motoŋ ta kembei: “Aa buri ituyam amre katu. Kam ŋoobo kek.”

²²Yooba, mbulu kizin ta boozomen tana, nu re lup. Zem zin ma tikamam ta kembei pepe. Mi mbot molo pio pepe.

²³Merere, maŋga mi menderkaala yo! Anutu tio, mender pio mi koto koŋ koi bizin.

²⁴Yooba, nu kamam mbulu ndeeŋeŋana men. Tana mender pio mi so pa koŋ koi bizin ta kembei: Nio leŋ uunu sa isaana som. Uulu yo. Kokena zin menmeen zin pa pataŋana ta ise tio i,

²⁵mi tiso: “Aa buri! Tilip pini. Pa koroŋ ta lelende pa be ipet pini, ta ipet pini kek!”

²⁶Yooba, zin wal ta tire pataŋana tio ti mi menmeen zin pa na, pamiaŋ zin mi kam zin ma tiru zaala. Zin wal ta tipakurkur zitun mi tirepilpiili yo na, koto zin mi kam zin ma kan miaŋ.

²⁷Tamen zin wal ta lelen be Anutu iuulu yo mi iswe kembei nio leŋ uunu sa isaana som, nako lelen ambai mi menmeen zin kat. Ko kalŋan izalla ma tizzo ta kembei: “Tapakur Yooba! Pa ni zaana biibi kat. Mi leleene be mbesooŋo kini imbot ambai.”

²⁸To nio ko aŋzzoyaryaara sua pa mbulu ku ndeeŋeŋana, mi kwoŋ ko ipakurkuru pa mbeŋ ma aigule.