Pesalem 28:2-6

²Embe jamôêc êndêŋ aôm ma jaôc lemoc sa êndêŋ nêm lôm ŋagamêŋ dabuŋsêga, naŋ ôkêŋ taŋam ŋoc taŋiboa.

³Ôtiŋ aê su jawiŋ lau, taŋ sêkac tauŋ su aŋga Anôtônê naŋ, to lau alôb-alôbwaga atom. Gebe lau tonaŋ nêŋ ŋalêlôm keso ma sêbanac biŋ gêdêŋ nêŋ lau jabaŋ êsêacŋa.

⁴Ôkêŋ ŋagêjô êndêŋ êsêac êtôm nêŋ gêŋ, taŋ sêgôm to sêjac lau mateŋanô aucŋa naŋ. Ôkêŋ ŋagêjô êndêŋ êsêac êtôm gêŋ, taŋ lemeŋ sêgôm naŋ, ôkêŋ gêŋ tau ŋagêjô êndêŋ êsêac.

⁵Gebe êsêac mateŋ gêdiŋ Apômtaunê gôliŋ to gêŋ, taŋ lêma gêgôm naŋ atom. Amboac tonaŋ oc enseŋ êsêac su e ênam êsêac sa êtiam atom.

⁶Aoc êôc Apômtau gebe eŋ kêkêŋ taŋa ŋoc taŋiboa kapôêŋ.