Pesalem 119:66-157

⁶⁶Ôndôŋ mêtê tokauc ma mêtê jakip biŋ saŋa êndêŋ aê gebe aê taêc kêka aômnêm biŋsu.

⁶⁷Gêdêŋ taŋ kôkôniŋ aê atomgeŋ naŋ, gao gamoa, mago galoc kamasaŋ aômnêm biŋ kêtu tôŋ.

⁶⁸Aôm ŋac gabêjam ma kômoasiŋ lau. Ôndôŋ aômnêm biŋsu êndêŋ aê.

⁶⁹Lau teŋbeleŋ aŋgeŋ sêga biŋ kêpi aê, mago aê kamasaŋ nêm jatu toŋoc ŋalêlôm samucgeŋ.

⁷⁰Êsêacnêŋ ŋalêlôm ôliŋ ŋakam amboac ŋalêsi kêkêkam lau, mago aê tec ŋoc ŋalêlôm kêkac aê kêtu nêm biŋsuŋa.

⁷¹Aôm kôkôniŋ aê, tec kêmoasiŋ aê gebe nêm mêtôc tau kêdôŋ nêm biŋsu gêdêŋ aê.

⁷²Awamsuŋ ŋabiŋsu kêmoasiŋ aê kêlêlêc awamata totoŋ-totoŋ su.

⁷³Aôm lêmam kôkêŋ to kôlêsôb aê. Ôwa ŋoc kauc sa gebe jajala aômnêm biŋsu.

⁷⁴Êsêac taŋ têtêc aôm naŋ, embe sêlic aê oc têntac ŋajam êsa gebe aê kakêŋ matoc aômnêm biŋ.

⁷⁵O Apômtau, aê kajala gebe aôm kômêtôc biŋ jagêdêŋgeŋ, tec kôkôniŋ aê kêtôm aômnêm biŋ ŋaŋêŋ.

⁷⁶Ôkêŋ nêm têmtac gêwiŋ teŋgeŋŋa ênam maŋ aêmaŋ, êtôm nêm biŋ, taŋ gôjac mata gêdêŋ nêm sakiŋwaga aê naŋ.

⁷⁷Taêm walô aê gebe jaŋgôŋ matoc jali gebe aê têtac gêwiŋ aômnêm biŋsuŋageŋ.

⁷⁸Teŋbeleŋ aŋgeŋ, taŋ sêgôm aê waec sec naŋ, majeŋ êsa ma aê tec taêc gêjam aômnêm biŋ, taŋ kôjatu naŋ ŋam.

⁷⁹Ôkêŋ êsêac, taŋ têtêc aôm to sêjala aômnêm biŋ, taŋ gôwa sa naŋ, gebe sêkac tauŋ ôkwi dêndêŋ aê.

⁸⁰Ôkêŋ aêŋoc ŋalêlôm êsap aômnêm biŋsu tôŋ gebe jaŋgôm tauc paliŋ atom.

⁸¹Aôm nêm moasiŋ gêjô katuc ma kakêŋ matoc aômnêm biŋ.

⁸²Matocanô kêkac gebe jalic biŋ, taŋ aôm gôjac mata naŋ, ma katu kênac gebe “Êndêŋ ondoc, go ônam malô aê.”

⁸³Aê katôm bêlabi, taŋ dedeŋ e kêtu toŋ naŋ, mago kaliŋ aômnêm gôliŋ siŋ atom.

⁸⁴Aômnêm sakiŋwaga nê bêc tendocgeŋ gêc. Êndêŋ ondocgeŋ, go ômêtôc lau, taŋ sêlêsu aê naŋ, nêŋ biŋ.

⁸⁵Lau taŋ sêkêli tauŋ naŋ, sêkwê sê aê. Lau taŋ seo gala aômnêm biŋ naŋ, sêgôm biŋ tonaŋ.

⁸⁶Aômnêm biŋsu samob tobiŋŋanôgeŋ. Êsêac sêôc aê ôkwi ŋa biŋ dansaŋ, amboac tonaŋ ônam aê sa.

⁸⁷Sauŋgeŋ oc senseŋ aê su janaŋa aŋga nom, mago aê tec gabe jawi biŋ, taŋ aôm kôjatu naŋ, siŋ atom.

⁸⁸Aôm ŋacmoasiŋ ônam aê sa êtu nêm têmtac gêwiŋ teŋgeŋŋa gebe jaŋgôŋ matoc jali gebe jaŋgôm awamsuŋ ŋabiŋ ŋanô êsa.

⁸⁹O Apômtau, aômnêm biŋ kêtu tôŋ kêsa aŋga undambê ma ênêc endeŋ tôŋgeŋ.

⁹⁰Aômnêm biŋ ŋaŋêŋ ênêc êtôm gôlôac to gôlôac. Aôm kôsuŋ nom su, tec gacgeŋ kêkô ŋajaŋa kêsa.

⁹¹Gêŋ taŋ kôkêŋ naŋ, kêkô e gêdêŋ galoc gebe gêŋ samob têtu nêm sakiŋwaga.

⁹²Aômnêm biŋsu embe êtu aê têtac gêwiŋ ŋamôkê atom, oc janaŋa êndêŋ taŋ gêŋwapac kêkôm aê auc naŋ.

⁹³Aê gabe jaliŋ aômnêm jatu siŋ atomanô gebe aôm kôkêŋ, tec kêpuc aê tôŋ gaŋgôŋ matoc jali.

⁹⁴Aê katu aômnêm gêŋ, ônam aê sa gebe aê kapuc aômnêm gôliŋ tec gamoa.

⁹⁵Lau alôb-alôb dêdib aê gebe senseŋ aê su, mago aê taêc gêjam aômnêm biŋ, taŋ gôwa sa naŋ.

⁹⁶Aê galic gêŋ samob ŋatêku gêc. Aômnêm biŋsu tageŋ tec ŋamadiŋ masi.

⁹⁷Aê têtac gêwiŋ nêm biŋsu kêlêlêc ma taêc gêjam kêtôm bêcgeŋ.

⁹⁸Nêm biŋsu gêc aêŋa ŋapaŋ ma gêgôm ŋoc kauc kêsa kêlêlêc ŋoc ŋacjonêŋ su.

⁹⁹Aêŋoc kauc kêlêlêc ŋoc kêdôŋwaga samob nêŋ su gebe aê taêc gêjam biŋ tageŋ, taŋ aôm gôwa sa naŋgeŋ.

¹⁰⁰Aêŋoc kauc kêsa kêlêlêc kwalam laŋgwa nêŋ su gebe aê kamasaŋ aômnêm jatu.

¹⁰¹Aê kagamiŋ ockaiŋ gêdêŋ lêŋ geo samob gebe Jamansaŋ aômnêm biŋ ŋapep.

¹⁰²Aê kakac tauc su aŋga nêm gôliŋ atom gebe aôm taôm kôdôŋ aê.

¹⁰³Aê kasaê aômnêm biŋ gebe ŋakana ŋajamanô. Kasaê ŋakana kêlêlêc lêp su gêc aocsuŋ.

¹⁰⁴Aômnêm jatu gêwa ŋoc kauc sa, tec kakêŋ kisa gêdêŋ biŋdansaŋ samob.

¹⁰⁵Aômnêm biŋ kêtu ockaiŋ ŋadaweŋ ma ja teŋ kêpô ŋoc intêna.

¹⁰⁶Aê katôc lemoc ma jamansaŋ êtu tôŋ gebe taŋoc wamu aômnêm gôliŋ gêdêŋ.

¹⁰⁷Gêŋwapac gêjac aê tôŋ kasêp ŋêŋgeŋ gaja. O Apômtau, ojop aê jamoa matoc jali êtôm nêm biŋ, taŋ gôjac mata naŋ.

¹⁰⁸O Apômtau, ôkôc ŋoc da lambiŋŋa sa ma ôndôŋ nêm gôliŋ êndêŋ aê.

¹⁰⁹Aê kasa paŋ lêndaŋ gebe jamac ênduŋa endeŋ tôŋgeŋ, mago kaliŋ aômnêm biŋsu siŋ atom.

¹¹⁰Lau alôb-alôb sêwa lakô aê, mago aê gao gala aômnêm jatu teŋ atom.

¹¹¹Biŋ taŋ aôm gôwa sa naŋ, kêtu ŋoc gêŋlênsêm teŋgeŋŋa kêtu aêŋoc ŋalêlôm kêtu samuc ŋam.

¹¹²Aêŋoc ŋalêlôm taê gêjam kêtu tôŋ gebe jaŋgôm aêmnêm biŋsu ŋanô êsa, jaŋgôm endeŋ tôŋgeŋ e jamac êndu.

¹¹³Aê kakêŋ kisa gêdêŋ lau, taŋ nêŋ ŋalêlôm gêja lu naŋ, mago aê têtac gêwiŋ aômnêm biŋsu.

¹¹⁴Aôm kôtu ŋoc lamu to lautuc. Aê kakêŋ matoc aômnêm biŋ.

¹¹⁵Amac lau secwaga, akac taôm sa naamoa jaêc. Aê gabe jamansaŋ ŋoc Anôtônê biŋsu.

¹¹⁶Ôpuc aê tôŋ êtôm biŋ, taŋ gôjac mata naŋ, gebe jamoa matoc jali. Aê kakêŋ matoc aôm, amboac tonaŋ ôŋgôm aê majoc êsa atom.

¹¹⁷Ôpuc aê tôŋ gebe jamoa ŋajam ma jamansaŋ aômnêm biŋsu endeŋ tôŋgeŋ.

¹¹⁸Aôm oc ôtiŋ lau samob, taŋ seo gala aômnêm biŋsu naŋ, siŋ gebe êsêac sêsau tauŋ ŋamelocŋageŋ.

¹¹⁹Lau samob, taŋ sêkac tauŋ su naŋ, aôm gôlic êsêac amboac gêŋ gambu. Ma aê tec têtac gêwiŋ biŋ, taŋ aôm kôdôŋ naŋ.

¹²⁰Aê katêc aôm e ôlilu gêli. Aê katêc tauc kêtu nêm mêtôcŋa.

¹²¹Aê kamasaŋ biŋ solop to biŋgêdêŋ kêtu tôŋ. Ôwi aê siŋ êndêŋ sêlêsutêna atom.

¹²²Ôjô nêm sakiŋwaga awa gebe ômoasiŋ eŋ. Ôkêŋ teŋbeleŋ aŋgeŋ sêkôniŋ aê tôŋ atom.

¹²³Matocanô ŋawapac kêsa gebe aê gaôŋ nêm moasiŋ, gaôŋ aôm gebe ônam aê sa êtôm gôjac mataŋa.

¹²⁴Ônam nêm sakiŋwaga sa êtôm nêm têmtac gêwiŋ teŋgeŋŋa ma ôndôŋ nêm biŋsu aê jajala.

¹²⁵Nêm sakiŋwaga aê, ôwa ŋoc kauc sa gebe jajala biŋ, taŋ aôm ôwa sa naŋ ŋapep.

¹²⁶Apômtaunê noc gebe êwaka tau saŋa kêdabiŋ gebe êsêac sêgôm aômnêm biŋsu popoc.

¹²⁷Kêtu tonaŋŋa aê têtac gêwiŋ nêm biŋsu kêlêlêc awamata totoŋ-totoŋ su.

¹²⁸Kêtu tonaŋŋa nêm jatu gêjam gôliŋ aê. Aê gadec lêŋ dansaŋ samob.

¹²⁹Biŋ taŋ aôm gôwa sa naŋ, kaiŋ teŋ. Kêtu tonaŋŋa ŋoc ŋalêlôm kêsap biŋ tau tôŋ.

¹³⁰Aôm embe ônac nêm biŋ lêtêŋ, oc êpô gamêŋ ma êwa lau meloc-meloc nêŋ kauc sa.

¹³¹Aômnêm biŋsu gêjô aê e aoc ec-ecgeŋ.

¹³²Ôkac taôm ôkwi êndêŋ aê ma taêm walô aê, êtôm gôgôm gêdêŋ lau, taŋ têntac gêwiŋ nêm ŋaê naŋ.

¹³³Ôkêŋ nêm biŋ êpuc ockaiŋ tôŋ ma ôkêŋ gêŋ sec teŋ ênam gôliŋ aê atom.

¹³⁴Ônam aê kêsi êndêŋ ŋamalac, taŋ sêkôniŋ aê tôŋ naŋ, go jamansaŋ aômnêm jatu êtu tôŋ.

¹³⁵Ôkêŋ laŋômanô êpô nêm sakiŋwaga ma ôndôŋ nêm biŋsu êndêŋ aê.

¹³⁶Matocsulu keseleŋ amboac bu kêtu lau sêmasaŋ aômnêm biŋsu atom ŋa.

¹³⁷O Apômtau, aôm ŋac gêdêŋ ma aômnêm gôliŋ jagêdêŋ samob.

¹³⁸Aôm kômasaŋ nêm biŋsu tobiŋgêdêŋ ma kômasaŋ tobiŋ ŋaŋêŋ ŋanô amboac tonaŋgeŋ.

¹³⁹Aê têtac ŋandaŋ kêlakoc aê sec kêtu ŋoc soŋo-soŋo sêliŋ aômnêm biŋ siŋŋa.

¹⁴⁰Aômnêm biŋ, taŋ gôjac mata naŋ, ŋakêŋkêŋ laŋgwageŋ ma nêm sakiŋwaga têtac gêwiŋ biŋ tau.

¹⁴¹Aê katu ŋac sawa to sêbu aê, mago kaliŋ aômnêm jatu siŋ atom.

¹⁴²Aômnêm biŋgêdêŋ kêtu biŋgêdêŋ teŋgeŋŋa ma aômnêm biŋsu tau biŋŋanô.

¹⁴³Aê kapô lêna to gêŋwapac gêgôm aê, mago nêm biŋsu gêgôm aê têtac ŋajam kêsa.

¹⁴⁴Biŋ taŋ aôm gôwa sa naŋ, oc ênêc ŋaŋêŋ endeŋ tôŋgeŋ. Ôwa ŋoc kauc sa, go jaŋgôŋ matoc jali.

¹⁴⁵Aê gamôêc toŋoc ŋalêlôm samucgeŋ gêdêŋ aôm. O Apômtau, ôkêŋ taŋam aêmaŋ. Aê gabe jamansaŋ aômnêm biŋsu êtu tôŋ.

¹⁴⁶Aê aoc gêjac aôm gebe ônam aê sa, go jaŋgôm biŋ, taŋ gôwa sa naŋ, ŋanô êsa.

¹⁴⁷Aê gadi gêdêŋ bêbêc kanucgeŋ ma kataŋ tauc kapôêŋ. Aê matoc kêsap aômnêm biŋ tec gamoa.

¹⁴⁸Matoc jali ŋapaŋ gêdêŋ gêbêc baliŋ e geleŋŋa ma taêc gêjam biŋ, taŋ aôm gôjac mata naŋ, gêc ŋoc ŋalêlôm.

¹⁴⁹Ôkêŋ taŋam aê êtu nêm têmtac gêwiŋ teŋgeŋŋa. O Apômtau, ôkêŋ aê jamansaŋ aômnêm gôliŋ.

¹⁵⁰Lau taŋ têtim aê, mago sêkac tauŋ su aŋga aômnêm biŋsu naŋ, têdabiŋ aêgac.

¹⁵¹Ma aôm Apômtau, tec gômoa aê ŋagala ma aômnêm biŋsu samob kêtu biŋŋanô.

¹⁵²Aê kajala biŋ, taŋ aôm kômasaŋ naŋ, wanêcgeŋ gebe aôm kômasaŋ gebe ênêc teŋgeŋŋa.

¹⁵³Ôlic ŋoc ŋandaŋ ma ônam aê samaŋ gebe aê kaliŋ aômnêm biŋsu siŋ atom.

¹⁵⁴Ônam gôliŋ ŋoc biŋ ma ônam aê kêsi. Ojop aê jamoa matoc jali êtôm nêm biŋ, taŋ gôjac mata naŋ.

¹⁵⁵Aôm oc ônam lau alôb-alôb kêsi atom gebe êsêac sesom aômnêm biŋsu atom.

¹⁵⁶O Apômtau, aôm taêm walô lau kêlêlêc. Ojop aê jamoa matoc jali êtôm nêm biŋgêdêŋ.

¹⁵⁷Lau taêsam sêjanda aê to sêlêsu aê, mago aê gawi aômnêm biŋ, taŋ gôwa sa naŋ, siŋ atom.