SALMOS 119:66-157

⁶⁶NoTeco, xinechchihuili ma nijmachili tlen cuali huan xinechmaca tlalnamiquistli, pampa na niquinneltocatoc motlanahuatilhua.

⁶⁷Achtohuiya quema aya tinechicnotlalijtoya para tinechtlatzacuiltis, san nimocuapolojtinenqui. Pero ama senquistoc nijchihua tlen quiijtohua motlajtol.

⁶⁸Ta nelía ticuali huan tijchihua san tlen cuali. Huajca xinechmachti quejatza ma nijchihua tlen tinechyolmelajtoc para nijchihuas.

⁶⁹Nopa tlacame tlen mohueyimatij nechistlacahuijtoque, pero na ica nochi noyolo nijchijtinemis tlen quiijtohuaj motlanahuatilhua.

⁷⁰Inijuanti huihuitique huan tzactoc inintlalnamiquilis, pero na nochipa nimopaquilismaca ipan moley.

⁷¹Nelía cuali para tinechicnotlali, pampa tinechnextili para ma nijchihua nochi tlen tinechyolmelajtoc ma tijchihuaca ipan toyolis.

⁷²Para na más ipati moleyes huan ax millones tlen oro huan plata.

⁷³TOTECO, ta ica moma tijsencajqui notlacayo. Huajca ama xinechpalehui ma niquinmachili motlanahuatilhua huan niquintzontecomatis.

⁷⁴Nochi tlen mitztlepanitaj huan motemachíaj ipan ta, paquise quema nechitase, pampa na nimotemachía ipan motlajtol.

⁷⁵TOTECO, na nijmati para motlamachtil senquistoc xitlahuac. Huan nopa tlatzacuiltili tlen tinechmacatoc nojquiya xitlahuac, huan nechhualiquilis tlamantli tlen cuali.

⁷⁶Huajca ama xinechyoltlalis ica moteicnelijcayo, senquistoc queja tinechilhuijtoc na, nimotlatequipanojca, para tijchihuas.

⁷⁷Xinechyahualo ica moteicnelijcayo para ma niyolto, pampa san ipan moley nijpantía paquilistli.

⁷⁸Ma huetzica ipan pinahualistli nopa tlacame tlen mohueyimatij, pampa tlahuel nechcocojtoque ica iniistlacaticayo. Pero na san nimoyolilhuijtinemis tlen quiijtohuaj motlanahuatilhua.

⁷⁹Ma sampa mosentilica nohuaya nopa tlacame tlen mitzimacasij huan mitztlepanitaj, huan tlen quiixmatij motlajtol.

⁸⁰Xijchihua para noyolo ma monejnemilti xitlahuac ipan nochi tlen tinechyolmelajtoc. Huan queja nopa ax quema nimopinahualtis.

⁸¹Na nitlapolosnequi pampa nijchiya para tinechmaquixtis tlen nocualancaitacahua, pampa nimotemachijtoc ipan tlen tiquijtojtoc para tinechchihuilis.

⁸²Noixtiyolhua tlaxicohuaj pampa quinequij quiitase ma pano nochi tlen tinechtlajtolcahuilijtoc para tijchihuas. ¿Hasta quema tinechyoltlalis ica motlapalehuil?

⁸³Ya nihuehuentzi huan nitzocoyolijtoc queja se cuetlax bolsa tlen quitlalijtoque campa poctli, pero ax niquilcajtoc tlen tinechyolmelajtoc.

⁸⁴¿Quesqui tonali monequi nijchiyas para tiquintlatzacuiltis tlen nechtoquilijtinemij?

⁸⁵Nopa tlacame tlen mohueyimatij huan tlen quicocolíaj moleyes quichijtoque se hueyi tlacoyoctli para ma nimasi.

⁸⁶Xinechpalehui, pampa motlanahuatilhua senquistoc xitlahuac, huan nechtepotztocatinemij yonque ax tleno nijchijtoc.

⁸⁷San quentzi nechixpolihuiltíaj, pero na ax niquinixpanotoc motlanahuatilhua niyon ax niquincajtoc.

⁸⁸Pampa hueyi moyolo, xinechcahuili ma niitzto. Huan queja nopa nijsenhuiquilis nijchihuas tlen quiijtohua motlajtol.

⁸⁹TOTECO, motlajtol eltos temachtli para nochipa nepa elhuicac.

⁹⁰Mojmostla ta titemachtli huan tiitztos temachtli ica nochi tlen tlacajtiyase para nochipa. Cuali ta tijtlatzquilti ni tlali huan queja nopa eltoc.

⁹¹Nochi tlamantli mocahua campa tiquinnahuati ma eltojca hasta ama ni tonal. Quena, nochi tlamantli tlen tijchijqui mitzneltocaj huan mitztequipanohuaj.

⁹²Intla ax nimopaquilismacatosquía ipan moley, huajca ya nimictosquía ica cuesoli.

⁹³Ax quema niquinilcahuas motlanahuatilhua, pampa ica motlanahuatilhua tinechmacatoc yancuic chicahualistli.

⁹⁴Na nimoaxca, xinechmaquixti pampa nochipa nijchijtinentoc tlen quiijtohuaj motlanahuatilhua.

⁹⁵Yonque nopa tlaixpanoca tlacame motlatise ipan ojtli para nechtzontlamiltise, na san nimoyolilhuijtos tlen motlajtol.

⁹⁶Nochi tlamantli tlen más cuajcualtzi niquitztoc canque ontlami, pero motlanahuatilhua, ax quipiyaj inintlamiya.

⁹⁷¡Tlahuel niquicnelía moley! San tlen ya nimoyolilhuijtinemi se tonal.

⁹⁸Motlanahuatilhua nechchijtoque más nitlalnamiqui que nocualancaitacahua. Pampa motlanahuatilhua nechyacantiyohuij mojmostla.

⁹⁹Quena, achi más nitlalnamiqui hasta niquintlani inijuanti tlen notlamachtijcahua, pampa na nimoyolilhuijtinemi tlen motlajtol.

¹⁰⁰Na más nijmachilía que nopa huehue tlacame, pampa nijchihua tlen quiijtohuaj motlanahuatilhua.

¹⁰¹Ax quema nijnectoc nijtoquilis se ojtli tlen ax cuali, pampa senquistoc nijnequi nijchihuas tlen quiijtohua motlajtol.

¹⁰²Ax nimohuejcatlalijtoc tlen motlamachtil, pampa ta tinechnextilía quejatza ma nimonejnemilti.

¹⁰³Motlajtol nelía cuali queja se tlatzopelcayotl. Achi más tzopelic nijmati que sayolnectli.

¹⁰⁴Motlanahuatilhua nechmacaj tlalnamiquistli. Yeca ax nijnequi niquitas niyon se tlamantli istlacayotl.

¹⁰⁵Motlajtol eltoc queja se tlahuili tlen quitlahuilía noojhui campa ninejnemi para ax nimotepotlamis.

¹⁰⁶Se huelta nitlatestigojquetzqui, huan ama sampa nitlatestigojquetzas para nijchihuas tlen quiijtohuaj motlamachtilhua pampa nelía xitlahuac.

¹⁰⁷TOTECO, nechca huala nopa tonali para nimiquis ininmaco nocualancaitacahua. Xinechmaca yancuic chicahualistli queja tiquijtojtoc para tijchihuas.

¹⁰⁸TOTECO, nimitztlajtlanía xijseli nopa tlascamatili tlen nimitzmaca queja se tlacajcahualistli. Huan xinechnextili motlamachtil.

¹⁰⁹Mojmostla nimopantía campa mahuilili para noyolis, pero ax niquilcajtoc moley.

¹¹⁰Nopa tlaixpanoca tlacame quitlalíaj tlaquetztli para ma nimasi huan nihuetzis ipan tlajtlacoli, pero na ax nimoiyocanequis tlen motlanahuatil.

¹¹¹Na san nimoaxcatijtoc motlajtol, pampa san ipan motlajtol nijpantía paquilistli.

¹¹²Ica nochi noyolo nijchihuas tlen quiijtohuaj motlanahuatilhua nochipa hasta nimiquis.

¹¹³Ax nijnequi niquinitas tlacame tlen quichihuaj ome ininxayac. Pero na niquicnelía moley.

¹¹⁴Ipan ta nimotlatía para ax nechcocose nocualancaitacahua huan ipan ta nimomanahuía. Pampa nimotemachía san ipan motlajtol.

¹¹⁵Ma nechtlalcahuica nopa tlacame tlen fiero inintlalnamiquilis. Ma ax nechcuatotonica pampa na nijnequi nijchihuas tlen quiijtohuaj motlanahuatilhua, Toteco Dios.

¹¹⁶Huajca noTeco, xinechmaca yancuic fuerza senquistoc queja tinechtlajtolcahuili. Huan queja nopa sequinoc ax quema huelis quiijtose para san tlapic nimochixtoc ipan ta.

¹¹⁷Xinechfuerzajmaca para nimomaquixtis ininmaco nocualancaitacahua, huan nochipa nijpiyas paquilistli para nijchihuas tlen tinechyolmelajtoc.

¹¹⁸Ta tiquinhuejcamajcajtoc nochi tlen quitlahuelcahuaj tlen tinechyolmelajtoc. Inijuanti quiijtohuaj tlalnamiquij, pero ax neli, san mocajcayahuaj.

¹¹⁹Nochi tlacame tlen quinpactía tlajtlacolchihuaj ipan ni tlaltepactli tiquinita queja itetejtzo tepostli tlen mocahua quema tijmolonía para tijtlapajpacchihuas. Pero na niquicnelía huan nijtlepanita motlajtol.

¹²⁰Nochi notlacayo huihuipica pampa mitzimacasi huan mitztlepanita, Toteco. Huan nojquiya niquimacasi motlatzacuiltil, huan yeca ax nijnequi nimitzixpanos.

¹²¹Na nijchijtoc tlen xitlahuac huan tlen melahuac moixtla. Amo xinechtlahuelcahua ininmaco nocualancaitacahua,

¹²²Xitlatestigojquetza para tinechtiochihuas na, nimotlatequipanojca. Amo xiquincahuili ma nechtlaijiyohuiltica nopa tlacame tlen mohueyimatij.

¹²³Campa hueli nitlachixtoc pampa nijchixtoc xinechmaquixtiqui tlen nocualancaitacahua, hasta tlaxicojtoque noixtiyolhua. Nijchixtoc xinechmanahui senquistoc queja tiquijtojtoc para tijchihuas.

¹²⁴TOTECO, ipan moteicnelijcayo xinechchihuili tlen cuali na, nimotlatequipanojca. Xinechnextili quejatza nijchihuas tlen tinechyolmelajtoc ma tijchihuaca.

¹²⁵Na nimotlatequipanojca, xinechmaca tlalnamiquistli, para niquixmatis motlajtol.

¹²⁶TOTECO, ya ajsic hora para timonextis huan tijchihuas tlen tiquita para cuali. Pampa ni tlaixpanoca tlacame ayoc quitlepanitaj moley.

¹²⁷Pero na más niquinicnelía motlanahuatilhua huan ax queja oro tlen senquistoc cuali.

¹²⁸Pampa nochi motlanahuatilhua nelía xitlahuac. Yeca ax nijnequi niquitas niyon se tlamantli istlacayotl.

¹²⁹Motlajtol nelía yejyectzi, TOTECO, yeca nijtoquilijtinemi ica nochi noalma.

¹³⁰Quema quiixtomaj motlajtol, techtlahuilía huan techtlalnamictía nochi titlacame, hasta nojquiya tlacame tlen san quentzi quimachilíaj.

¹³¹Yeca tlahuel nijnequi niquixmatis más tlen quiijtohuaj motlanahuatilhua, huan ya nopa nijtemohua.

¹³²Xinechtlachili huan xinechtlasojtla, queja timomajtoc tiquinchihuilía tlen mitzicnelíaj.

¹³³Xinechyacana ipan se cuali ojtli ica motlajtol para ax nechtlanis niyon se tlaixpanoli.

¹³⁴Xinechmanahui tlen nopa tlacame tlen mosisiníaj huan quinequij nechtlaijiyohuiltise. Huan queja nopa nijchihuas tlen quiijtohuaj motlanahuatilhua.

¹³⁵Ma monexti moteicnelijcayo ipan moxayac quema tinechtlachilía na, nimotlatequipanojca, huan xinechmachti nochi tlen tinechyolmelajtoc para ma tijchihuaca.

¹³⁶Tlahuel nichoca pampa miyac tlacame ax quitlepanitaj moley.

¹³⁷TOTECO, ta nelía tixitlahuac huan nochi tlatzacuiltili tlen titemaca nojquiya xitlahuac.

¹³⁸Nochi motlajtol xitlahuac huan temachtli para ipan ma timotemachica.

¹³⁹Nelía nimocuesohua huan nicualani, pampa nocualancaitacahua ax quitlepanitztoque tlen ta tiquijtojtoc.

¹⁴⁰Nochi moley nijyejyecojtoc huan niquitztoc para nelía tlatzejtzeloltic. Yeca niquicnelía.

¹⁴¹Nelía niteicneltzi huan miyac ax quinequij nechitase, pero na ax niquinilcajtoc motlanahuatilhua.

¹⁴²Ta tijchihua tlen xitlahuac para nochipa huan moley senquistoc melahuac.

¹⁴³Nopani huetztoc cuesoli huan tlaijiyohuilistli, pero motlanahuatilhua san ya nopa nechyolchicahuaj.

¹⁴⁴Motlajtol nochipa xitlahuac. Xinechmaca tlalnamiquistli para nijmachilis huan queja nopa huelis niitztos.

¹⁴⁵Ica nochi noyolo nimitztzajtzilía. Xinechnanquili noTeco, huan nijchihuas tlen tinechyolmelajtoc.

¹⁴⁶Na nimitztzajtzilía huan nimitzilhuía: “Xinechmaquixti tlen nocualancaitacahua”, huan nijchihuas tlen quiijtohua motlajtol.

¹⁴⁷Nimehua ica ijnaloc quema aya quisa tonati, huan nimitztzajtzilía, TOTECO, pampa san ipan motlajtol nimotemachía.

¹⁴⁸Ica tlayohua ax nicochi pampa san nimoyolilhuía tlen nochi tlen tiquijtojtoc tinechchihuilis.

¹⁴⁹Xinechtlacaquili pampa titetlasojtla, TOTECO. Xinechmaca yancuic chicahualistli queja quiijtohua motlamachtil para tijchihuas.

¹⁵⁰Nechca hualahuij nopa tlacame tlen mosisiníaj huan nechtepotztocatinemij. Inijuanti mohuejcatlalijtoque tlen moley.

¹⁵¹Pero ta tinoTeco tiitztoc nonechca. Nochi motlanahuatilhua senquistoc melahuac.

¹⁵²Hasta quema niitztoya nipilsiltzi niquixmatqui motlajtol, huan nijmatqui para motlajtol ax quema mopatlas para nochipa.

¹⁵³Xijtlachili notlaijiyohuilis huan xinechmanahui, pampa ax niquilcajtoc moley.

¹⁵⁴Quena, xinechtenpalehui huan xinechmanahui queja tinechtlajtolcahuilijtoc para tijchihuas.

¹⁵⁵Ax tiquinmaquixtis nopa tlacame tlen ax mitztlepanitaj. pampa inijuanti ax quichihuilíaj cuenta tlen tinechyolmelajtoc.

¹⁵⁶TOTECO, ta tlahuel tinechtlasojtla. Xinechmaca yancuic chicahualistli queja quiijtohua motlamachtil para tijchihuas.

¹⁵⁷Miyac nocualancaitacahua nechtepotztocatinemij huan quichihuaj campeca para ma nimitzixpano, pero na ax nijcajtoc motlajtol.