1Motong la tool tani in iwete pau mulu nen, “Nga ole kuwodo betanga nga ilo ye rau a kuyawar pang bangabangana ke Maro yo matan kala di tooltool yo tigaua ye bareme ke Yesu a tiyepe Sadis nga. Ngan betanga tina ngan nen: Au i, di bangabangana ke Maro yo limi be ru nga, ngan tiyepe yau. Inbe au i atoko kanpitiki tina yo limi be ru nga ye baek. In la ayawar betanga nga a imala pang yong kuye di tooltool kiong nga. Au i lok galanga ye so yo kayei ngan oo. Ngan di tooltool tiwetang nen, be ang ngan kamaurur go, bong ngan tiap. Ang ngan kammata oo.
2Ngan nanga, ole kamadit a kapamede dada dook mata kiang kasin yo imata tiao a ikenen go, ngan mulu le imede. Yesoo, akamata dada kiang yo kayei ngan dook mata le imot tiap ye Maro kiau matana.
3Nen le lomim tut ye bingi dook mata yo muku ngan kalonga a kakauu koot i, inbe kaportak lomim a katoo. Bong kumata le be kamadit tarai tiap nga, ngan ole amala pombe pang yang dawa ben tool ke pinnau yo iyei urata ki sollono i, le o ke be lomim galanga ye lal yo be amala pang yang ye in tiap.
4Bong di tooltool kiang pattu yo kaye di kayepe Sadis nga, ngan tikaptut sousoungu kidi le tiyei a giri leu tiap. Di tooltool tina ngan dada kidi yo tiyei nga, ngan dook mata le imot le ke be tisousou ye sousoungu kookoonoo, inbe ole aye di ampa.
5Nen le kumata be tool ikodo le imede le illos dada dook tiap yo ke noonoo nga, ngan ole isousou ye sousoungu kookoonoo dawa ben di tooltool tina. Inbe ole awulngana ene ye rau ke yepongo dook mata yo taukan motingi i, in tiap. Bong ole awete pang Tamak iye di bangabangana ki be ya in tooltool kiau.
6Ngan nen le sei tool be talngana nga, ngan itar talngana dook a ilongo betanga ke Maro Amunu Silene yo iwete pang di tooltool yo tigaua ye bareme le imot ke Yesu nga.”
7Motong la tool tani in iwete pau mulu nen, “Nga ole kuwodo betanga nga ilo ye rau a kuyawar pang bangabangana ke Maro yo matan kala di tooltool yo tigaua ye bareme ke Yesu a tiyepe Piladelpia nga. Ngan betanga tina ngan nen: Au i, Maro ipootau panga ya taunu, inbe awete betanga kiau ngan moolmool le imot, inbe au i la atoko so ke pamedenge dada ke Dawiti i. Le kumata be aso dada ke so sa nga, ngan tool sa yo be itiukala ngan tiap, inbe kumata be atiukala dada ke so sa nga, ngan tool sa yo be iso, ngan tiap lapau. In la ayawar betanga nga a imala pang yong kuye di tooltool kiong nen.
8Au i lok galanga ye dada kiang yo kayei nga. Ngan la kakamata, aso dada pang a koon panganga le ke be tool san itiukala tiap. Inbe lok galanga yang be ang ngan gurana kiang mai mata tiap, bong kaparama betanga kiau le imede, inbe kawala murimim pau tiap lapau.
9Ngan di tooltool kiang pattu yo kaye di kagaua Piladelpia nga, ngan tiwete be di ngan di Yuda. Bong di ngan Yuda tiap, di ngan tooltool ke kaplungunu le tiyepe ye budanga ke tool dook tiap Satan. Le nga kalongo, ole ayei di le timan man tigun turudi potai ye kemim punu, a be nen ngan lodi galanga yang ben au i lok dook mata pang mai san.
10Ngan tina kaparama betanga kiau inbe kakodo le tutube a kasolo urata moonoo yo pombe pang yang nga, ngan la ole matak kalang dook ye lal ke touanga yo be pombe a itouo di tooltool le imot ke tana i nga.
11Au i ole amulu a asi pombe palbe leu. Nen le kaparama lo medana kiang yo kataru pau i, in le imede, a be nen ngan tool sa ke be ikap koomoo ke kutomim yo be akap pang ye urata kootoonoo kiang nga, ngan tiap.
12Nen le kumata be tool ikodo le imede le illos dada dook tiap yo ke noonoo nga, ngan ole apatokode a ikodo dama ke Maro kiau dawa ben sawa yo ikodo kataunu ke bareme mai ke sungunu ki a ipamede i. Nen le ke be iyege bareme mai tani a idu ke diki tiap. Inbe ole awodo Maro kiau ene inbe ek paunu ilo ye. Inbe malala mai ke Maro kiau yo Yerusalem Paunu i, in ole awodo ene ilo ye lapau. Inbe malala mai tani in ole ipa ye malala ke Maro a isi pang tana i.
13Ngan nen le sei tool be talngana nga, ngan itar talngana dook a ilongo betanga ke Maro Amunu Silene yo iwete pang di tooltool yo tigaua ye bareme le imot ke Yesu nga.”
14Motong la tool tani in iwete pau mulu nen, “Nga ole kuwodo betanga nga ilo ye rau a kuyawar pang bangabangana ke Maro yo matan kala di tooltool yo tigaua ye bareme ke Yesu a tiyepe Laodisia nga. Ngan betanga tina ngan nen: Au i tool tani yo tipootoo ek ye Moolmool i, inbe araia lok moolmool le imot ye urata i, inbe awetewete betanga moolmool ke Maro ye soo so yo akamata nga. Inbe au i tool tani yo kulkulunu yege ngan ayepe le ayei kuto mai pang so tina le imot yo Maro itar nga. In la ayawar betanga nga a imala pang yong kuye di tooltool kiong nga.
15Ngan au i lok galanga ye dada kiang yo kayei ngan oo. Ang ngan dawa ben ran ke yinungu, bong ang ngan ran yesene too ran silene ngan tiap. Nen le ole akoronai ang ye kook a kadu tana. Ngan au lok be ang ngan kayepe dawa ben ran yesene too ran silene, bong ngan tiap. Ang ngan dawa ben ran yo imellungu i.
17Le ang ngan kawete nen, ‘Am nga ballingamam, le pat ke yimoongoo so le so kiam alunu le alunu san le ke be ammaka ye so siap.’ Bong ngan tiap, ang ngan yepongo kiang dook tiap yege le di tooltool tikamatang ngan lodi pang san. Inbe ang ngan ballingamim tiap, inbe matamim ngan ikisis, inbe kayepe tinimim koonoo. Ngan ang ngan yepongo kiang dook tiap nen, bong lomim galanga ye tiap.
18Nen le akap noonoongoo pang be kayimi pat gol yo tiyesnai ye ei, ngan le iwesewese a giri ki imaruru a idu tana inbe isallin dook mata nga, ngan yau. Ngan kumata le be kayei nen nga, ngan la be ole kayei tooltool ballingadi moolmool nga. Inbe kayimi sousoungu kookoonoo yau a be nen ngan kasousou ye a iyakala tinimim yo ikenen sokorai nga. Inbe kayimi bar yo ke be katar lo matamim ngan yau, a be nen ngan matamim dook mulu a kamata ni ye.
19Ngan nanga, di tooltool yo lok pang di mai san nga, ngan ole apasak pang di ye dada dook tiap yo tiyei nga, a be nen ngan akarata di. Le nga ole lomim ikaua urata dook ye dada kiang yo kayei nga, inbe kaportak lomim mulu.
20Kakamata, au naii la akododo dada koonoo a apitpiti dada i, le kumata be tool sa ilongo kalngak inbe iso dada pau nga, ngan ole alo rumu lono ki a lo amru amyepe a akan so, inbe ya ikan so yau lapau.
21Nen le kumata be tool ikodo le imede le illos dada dook tiap yo ke noonoo nga, ngan ole amalum panga be lo amru amwur ye kookoowoo kiau a be nen ngan amyei tooltool kuto maimai pang di tooltool nga le imot. Moolmool, ole aye amwur ye kookoowoo kiau dawa ben tina yo muku ngan akodo le amede le allos dada dook tiap ke tana ngan le lo aye Tamak amwur ye kookoowoo ki a amyei tooltool kuto maimai pang di tooltool nga.
22Ngan nen le sei tool be talngana nga, ngan itara talngana dook a ilongo betanga ke Maro Amunu Silene yo iwete pang di tooltool yo tigaua ye bareme le imot ke Yesu nga.”
