1Motong la di bangabangana ke Maro limi be ru yo titoko omai limi be ru nga, ngan atu kidi in iman le man iwete pau. Iyei ne, “Ai, kuman a man apatnaia so yo be pombe pang ye garup lekelekene yo iwur potai pang ye ran maimai ngan gigini, in pong. Ngan so tani in ole pombe pang ye, ye dada dook tiap ki yo iyei, ngan kootoonoo.
2Ngan garup tani in di tooltool yo tiyei kuto maimai pang tana maimai nga, ngan tiye tiyei bauk. Inbe di tooltool le imot yo ke tana i nga, ngan di lapau tiye tiyei bauk le tiyei kapa dawa ben tool iyini ran medana yo ene wain in le kuton moo ye a iyei kapa nga.”
3Le nga bangabangana ke Maro tani in iwete pau nen a imot, motong la Maro Amunu Silene ipaponau, inbe bangabangana tani in ikau au le amla ye ni sorrakene atu. Ngan le akamata garup atu in iwurur asara gok dook tiap kooroonoo in pono. Ngan asara gok tani, in tiwodo betanga dook tiap edi alunu le iduku tinini mai i le imot. Inbe kutono ngan limi be ru, inbe sipi ki ngan sangaul.
4Ngan garup tani in sousoungu yo isousou ye in kooroonoo inbe yoongoonoo le dook mata san. Inbe moro ki yo isorosoro ye nga, ngan gol ipa ye pat matana matana yo isallin dook mata nga. Inbe matauu ki ngan tikarata ye pat ke gomo yo sallinene nga. Inbe itoko ruku atu ye baene. Ngan ruku ki tani in tikarata ye gol, bong ipon ye dada dook tiap yo giri leu nga, inbe dada ki dook tiap ke bauk yo ikini biana nga.
5Inbe tiwodo garup tani in ene ilo damono, bong punu in iken sollono. Ngan le ene tani in tiwode nen: GARUP MAI YO BABILON I. DI GARUP LE IMOT YO LEKELEKEDI NGA, INBE DI TOOLTOOL YO TIYEI DADA DOOK TIAP YO GIRI LEU NGA, NGAN TINADI LA YA I.
6Ngan garup tani in muku ngan iwete le tiraumata di tooltool ke Maro pattu, inbe di tooltool yo tiwetewete bingi dook mata ke Yesu, ngan pattu lapau. Ngan tina yo iyei nen nga, le ben iyin rara kidi tooltool tina le lon ponana ye dawa ben tool yo iyin ran medana mata ngan le lon ponana ye i. Nen le ye kene yo akamata garup tani in nga, ngan le atakrai welewele ye.
7Motong la bangabangana ke Maro iwete pau nen, “Ai, nga yelei a le kutakrai nga? Ngan ole apagalangong ye betanga yo iken sollono nga ye garup yo iwurur asara gok dook tiap in pono a yaru tipa i. Inbe ole ipagalangong ye asara gok tani yo kutono limi be ru inbe sipi ki sangaul, in lapau nen.
8Ngan asara gok dook tiap yo kumata i, in muku ngan iyepe, bong nookoot ngan iyepe tiap. Bong ole ipa ke tana gumono yo taukan launu in a ise, a be nen ngan Maro iyemenaii a isolo masngana le ikenen nen a ila. Le ye kene yo be ise ye in nga, ngan di tooltool ke tana yo taukadi edi iken ye rau ke yepongo dook mata yo taukan motingi in nga, ngan ole titakrai ye. Ngan di tooltool tina nga, ngan kulkulunu yege ye kene yo Maro itar so nga le imot a pompombe tiao inbe tiwodo di tooltool edi ilo ye rau tani nga, ngan le di ngan tiwodo edi tiap. Di ngan ole titakrai ye asara gok tani, yesoo ya in muku ngan iyepe, bong nookoot ngan iyepe tiap, bong pang dama ni ngan ole ise pombe mulu.
9“Nen le tool be kutono ikaua urata dook, inbe lon ikaua urata ye dada dook mata yo tarantatu nga, ngan ole lon galanga dook ye so yo nga. Ngan asara gok tani in kutono yo limi be ru nga, ngan inanpootoo kawal limi be ru yo garup tani in iwur pono nga.
10Inbe gaongo leu ye kutono yo limi be ru nga, ngan inanpootoo di tooltool kuto maimai limi be ru yo matadi kala tana maimai nga lapau. Di tooltool kuto maimai tina nga, ngan limi ngan timmata oo, inbe atu la iyepe go i. Inbe san mulu in pombe tiao, bong ye kene yo be pombe ye in nga, ngan ole iyepe ye manga mooloo kasin leu.
11Inbe asara gok tani yo muku ngan iyepe inbe nookoot ngan iyepe tiap i, in tool kuto mai san mulu le iyei ben limi be tol kidi diene yo limi be ru nga. Bong ole Maro iyemenaii a isolo masngana le ikenen nen a ila.
12“Ngan sipi sangaul yo kumata ikodo ye asara gok dook tiap tani in kutono nga, ngan tinanpootoo di kuto maimai sangaul yo tikap gurana pang di be matadi kala tana maimai ye, ngan tiao nga. Bong ole tiye asara gok tani in tikaua gurana mai a nen ngan tiyei kuto maimai, inbe matadi kala tana maimai ye manga modono kasin leu.
13Inbe di kuto maimai tina ngan ole tigaua lodi le atu, inbe tisuket gurana kidi yo be matadi kala tana maimai ye nga, ngan pang asara gok tani.
14Inbe di kuto maimai tina tiye asara gok tani in ole tiye Sipsip Natunu tipatoko. Bong Sipsip Natunu ole illos di ye patokongo, yesoo ya taleu in la Tool Mai i, le di tooltool maimai kapala nga, ngan tiyepe parmana. Inbe ya taleu in la Tool Kuto Mai i, le di tooltool kuto maimai kapala nga, ngan tiyepe parmana lapau. Bong di tooltool yo tiye tiyepe nga, ngan di tooltool yo ikiu di a ipootoo di panga ya taunu nga, inbe di tooltool yo titara lodi le imede panga inbe titoo nga.”
15Ngan bangabangana ke Maro tani in iwete pau nen a imot, motong la iwete pau mulu nen, “Ran maimai yo kumata garup lekelekene tani in iwur lo pono nga, ngan tinanpootoo di tooltool ke tana maimai nga le imot. Di tooltool tina ngan di tooltool budanga maimai yo tigaua a tiyepe gaongo nga, inbe di tooltool yo kulidi le koodi ki ki ngan lapau.
16Ngan asara gok dook tiap inbe sipi ki sangaul yo kumata nga, ngan ole lodi pang garup lekelekene tani in tiap. Le ole tigarungu le ipa ye so ki le imot le iyepe tinini koonoo. Inbe ole tikan medana lo ngan be tidauni ye ei.
17Ole tiyei nen, yesoo Maro iwetewete la lodi be titoo dada yo lono be titoo nga. Nen le tigaua lodi le atu a tikaua gurana kidi pang asara gok tani, a be nen ngan iyei tool kuto mai pang di tooltool ke tana i. Ngan ole tikaua gurana panga a nen ngan iyei kuto mai le ilo ye lal yo be betanga ke Maro yo di Maro koonoo tiwete nga, ngan kanono pombe moolmool le imot ye.
18Inbe garup tani yo kumata muku i, in inanpootoo malala mai yo di tooltool ki ngan tiyei kuto maimai pang di tooltool kuto maimai kapala yo matadi kala di tooltool ke tana nga le imot i.”
