Olcueih 6:12-26

¹²Aka muen hlang neh boethae hlang tah a ka dongkah olhmaang nen ni a pongpa.

¹³A mik neh a mikhip, a kho neh a thui, a kutdawn neh a thuinuet.

¹⁴A lungbuei kah a calaak neh a tuetang takuem ah boethae bueng a paem tih, tingtoehnah neh hohmuhnah a khuen.

¹⁵Te dongah amah kah rhainah loh buengrhuet a thoeng thil vetih hoeihnah om kolla khaem pahoi ni.

¹⁶He parhuk he BOEIPA loh a thinah tih a hinglu dongah tueilaehkoi khuikah tueilaehkoi parhih tah.

¹⁷A honghi lai aka ludoeng kah a mik, ommongsitoe kah thii aka long sak kah a kut,

¹⁸Boethae kopoek aka paem lungbuei, boethae dongla aka yong paitok kho,

¹⁹A hong kah laipai loh laithae ol a sat tih pacaboeina lakli ah tingtoehnah la a khuen.

²⁰Ka ca, na pa kah olpaek te kueinah lamtah na nu kah olkhueng phap sut boeh.

²¹Na lungbuei ah rhawp hlaengtang lamtah na rhawn ah rhawp laikoeinah lah.

²²Na caeh vaengah nang m'mawt vetih na yalh vaengah nang te n'tawt ni, na haenghang vaengah nang n'lolmang puei ni.

²³Olpaek tah hmaithoi ni, olkhueng khaw vangnah ni, thuituennah dongkah toelthamnah khaw hingnah longpuei ni.

²⁴Huta thae taeng lamkah neh kholong nu ol hnal lamloh nang aka ngaithuen ham ni.

²⁵A sakthen te na thinko nen khaw nai boeh, a mikkhu nen nang te n'hloih boel saeh.

²⁶Pumyoi nu tah buh hluem ham ni, tedae hlang yuu long hinglu phutlo khaw a hoem.