Olcueih 6:1-15

¹Ka ca, na hui ham rhi na khang tih kholong ham na kut na tum atah,

²Na ka dongkah olthui loh n'hlaeh coeng tih na ka dongkah olthui loh n'khaih.

³Te te na saii dongah ka ca aw, na huul uh cakhaw na hui kah kut ah ni na pha hae. Te dongah cet, mawn lamtah na hui hloep laeh.

⁴Na mik te ih sak boeh, na mikkhu te ngam boeh.

⁵Kut dongkah kirhang bangla sayuep kut dongkah vaa bangla namah huul uh laeh.

⁶Kolhnaw aw lunghi taengla cet lah, anih kah khosing ke hmu lamtah cueih van lah.

⁷A taengah rhalboei khaw, rhoiboei khaw, aka taemrhai ham khaw om mai pawh.

⁸Khohal ah a buh te a soepsoei tih cangah ah a caak te a yoep.

⁹Kolhnaw aw me hil nim na yalh vetih na ih lamloh me vaengah nim na thoh ve?

¹⁰Bet ih, bet ngam, kut poem bet neh na yalh.

¹¹Te vaengah na khodaeng te aka cet paitai bangla, na tloelnah loh photling aka bai hlang bangla ha pawk ni.

¹²Aka muen hlang neh boethae hlang tah a ka dongkah olhmaang nen ni a pongpa.

¹³A mik neh a mikhip, a kho neh a thui, a kutdawn neh a thuinuet.

¹⁴A lungbuei kah a calaak neh a tuetang takuem ah boethae bueng a paem tih, tingtoehnah neh hohmuhnah a khuen.

¹⁵Te dongah amah kah rhainah loh buengrhuet a thoeng thil vetih hoeihnah om kolla khaem pahoi ni.