Olcueih 14:5-28

⁵Oltak rhoek kah laipai tah a laithae moenih. Tedae a honghi kah laipai long tah laithae ni a sat.

⁶Hmuiyoi loh cueihnah a tlap dae a hong ni, mingnah he aka yakming ham tah yoeikoek mai.

⁷Hlang ang te a hmai lamloh caeh tak, mingnah olka te na ming pawt ve.

⁸Aka thaai kah cueihnah long tah a longpuei te a yakming dae, aka ang kah a anglat tah thailatnah ni.

⁹Aka ang loh hmaithennah te a hnael dae, aka thuem long tah a laklo ah kolonah a saii.

¹⁰A hinglu khahingnah loh lungbuei a ming. Te dongah a kohoenah dongah rhalawt loh boi thil pawh.

¹¹Halang rhoek kah im tah a phae pah vetih aka thuem kah dap tah rhoeng ni.

¹²Longpuei he hlang kah mikhmuh ah thuem dae a hmailong ah dueknah longpuei la om.

¹³Nueihbu dongah lungbuei loh thak a khoeih tih, a tloihsoi ah kohoenah khaw ah pha-ueknah la poeh.

¹⁴Lungbuei aka balkhong khaw, hlang then khaw a khosing te amah hah bitni.

¹⁵Hlangyoe long tah olka boeih te a tangnah dae, aka thaai long tah a khokan te a yakming.

¹⁶Aka cueih long tah a rhih tih boethae te a nong tak. Tedae aka ang long tah a paan tih a omtoem.

¹⁷Thintoek bangkek loh a anglat a phoe tih, tangkhuepnah aka khueh hlang khaw a hmuhuet uh.

¹⁸Hlangyoe loh anglat a pang tih, aka thaai rhoek loh mingnah te a muei uh.

¹⁹Hlang thae rhoek te hlang then rhoek kah mikhmuh ah, halang rhoek te hlang dueng kah vongka ah ngam uh ni.

²⁰Khodaeng te a hui long khaw a hmuhuet tih, hlanglen tah muep a lungnah.

²¹A hui taengah aka hnoelrhoeng uh tah tholh tih, mangdaeng kodo aka rhen tah a yoethen.

²²Boethae aka uep rhoek te kho a hmang uh moenih a? Tedae sitlohnah neh uepomnah long tah hnothen ni a caai thil.

²³Patangnah cungkuem loh kumkonah a om sak. Tedae hmuilai dongkah ol bueng ngawn tah tloelnah la poeh.

²⁴Khuehtawn he aka cueih rhoek kah a rhuisam la om tih, aka ang rhoek tah anglat la anglat coeng.

²⁵Oltak kah laipai loh hinglu a huul tih, hlangthai palat laithae a sat.

²⁶BOEIPA hinyahnah dongah pangtungnah sarhi khaw om, te dongah a ca rhoek ham hlipyingnah la om.

²⁷BOEIPA hinyahnah hingnah thunsih neh, dueknah hlaeh lamloh aka phaelh sak la om.

²⁸Pilnam kah cangpai dongah ni manghai kah rhuepomnah khaw a om, namtu a om pawt vaengah mangpa kah porhaknah la om.