Nnegau 2:6-25

⁶I di nadau longono di longoaa deenei, digau dogologo ga mmui mai gi di gowaa deelaa. Digaula gu homouli, idimaa, tangada nei mo tangada nei gu longono nadau helekai donu ala e helehelekai ai digau hagadonu aalaa.

⁷Malaa, i di nadau goboina huoloo, gei digaula ga helehelekai, “Digau aanei ala e leelee beenei, la digau o Galilee!

⁸Ma e hai behee go tadau hagalongo gi digau aalaa, e leelee i nia helekai o tadau henua donu?!

⁹Gidaadou digau mai Parthia, Media, Elam, Mesopotamia, Judea, Cappadocia, Pontus, Asia,

¹⁰Phrygia, Pamphylia, Egypt, mo mai nia waa henua o Libya ala e hoohoo gi Cyrene. Gei hunu gidaadou digau mai Rome:

¹¹digau o Jew mo digau tuadimee ala guu dau gi taumaha o digau o Jew. Gei hunu gau i gidaadou la mai Crete mo Arabia, gidaadou huogodoo guu bida hagalongo hua gi digaula ala e leelee i tadau helekai donu, e haga modongoohia aga nia mogobuna haga goboina o God!”

¹²Digaula gu goboina, ga heheeu i nadau mehanga, “Ma e hai bolo aha dono hadinga?”

¹³Hunu ginaadou ga haga balumee digaula ga helekai, “Digau hagadonu aalaa le e libaliba!”

¹⁴Peter ga duu aga ngaadahi mo digau agoago hagau dilongoholu maa dahi, ga helekai gi nua, ga daamada ga agoago gi digau dogologo aalaa, “Ogu ihoo digau o Jew mo goodou huogodoo ala e noho i Jerusalem. Goodou hagalongo gi humalia gi agu helekai, au ga hagi adu tadinga di mee deenei.

¹⁵Nia daangada aanei la hagalee libaliba be godou hagamamaanadu. Dolomeenei di laa le e hiwa luada.

¹⁶Malaa, deenei di mee a soukohp Joel ne helekai ai,

¹⁷‘God ne helekai boloo: Deenei dagu mee gaa hai i nia laangi muliagi: Au ga llingi ia dogu Hagataalunga gi hongo digau huogodoo. Godou dama daane mono dama ahina ga hagadele agu helekai. Nia dama daane mo digau mmaadua gaa hai nadau moe.

¹⁸I nia laangi aalaa, gei Au ga llingi ia dogu Hagataalunga gi hongo agu gau hai hegau, nia daane mo nia ahina, gei digaula ga hagadele agu helekai.

¹⁹Au gaa hai agu mogobuna i di langi, mono hagailongo haga goboina i henuailala. Nia dodo, mo di ahi, mo di huiahi gohu huoloo ga kila aga.

²⁰Di laa ga bouli dongoeho, di malama gaa huli gaa mmee be nia dodo, i mua di laangi aamua madamada dela e hanimoi ai Dimaadua.

²¹Be koai hua dela ga gahigahi di ingoo o Dimaadua i di hagamaamaa, geia ga hagamouli.’

²²“Nia daane o Israel! Hagalongo gi agu helekai aanei: Jesus o Nazareth, dela ne hai mee gi di mogobuna o God, dela gu haga modongoohia aga go nia mogobuna mono mee hagagoboina huogodoo ala ne hai go God mai dono baahi. Tangada nei mo tangada nei i goodou gu iloo nia mee aanei, idimaa, nia mee aanei ne hai i godou mua.

²³Taane deenei dela ne gowadu go God gi goodou la di hagahonu o dana bilaan, gei goodou ne daaligi a Mee i di wanga a Mee gi digau huaidu, e daudau gi di loobuu.

²⁴Gei God gu haga mouli aga a Mee, gu hagamehede a Mee gi daha mo di mogobuna o di made, idimaa, di made le e deemee di galabudi a Mee.

²⁵Deenei di mee David ne helekai ai di hai o maa: ‘Au gu gidee Dimaadua e noho i ogu mua i nia madagoaa huogodoo. Mee e hoohoo mai gi di au, gei au e deemee di tale gi di haingadaa.