Aposel 2:6-25

⁶Ma elaŋô diŋdiŋ ba êlêm ethak doŋtom. Ma eboloba kambom hathak elaŋô ŋê êŋ enaŋ abô hathak thêlô tomtom da iniŋ abô.

⁷Ma esoŋ kambom ba enaŋ hik thêlôda liŋ, “Thêlô ma ŋê Galili iyom. Malê te aêŋ am?

⁸Aisê ba alalô alaŋô thêlô enaŋ abô hathak alalôaniŋ abô tomtom?

⁹Alalô ma anêŋ Patia lo Midia ma Ilam lo Mesopotemia ma Judia lo Kapadosia ma Pontus lo Esia

¹⁰ma Plijia lo Pampilia ma Ijip lôk Libia bute atu habobo Sailini ma ŋê doho anêŋ Lom.

¹¹(Ma vi ma avômalô Islael, ma vi ma avômalô loŋ buyaŋ takatu ba ibitak êyô Islael iniŋ êvhaviŋ kapô.) Ma doho anêŋ Klit lo Alebia. Ma doŋtom alalô alaŋô thêlô enaŋ abô hathak nômbêŋ atu ba Wapômbêŋ hadum hathak alalôaniŋ abô tomtom.”

¹²Ma avômalô sapêŋ esoŋ kambom ba itutuniŋ leŋiŋkadôk ma enaŋ hik thêlôda liŋ nena, “Nôm êŋ anêŋ ôdôŋ ma aisê?”

¹³Ma doŋtom vi ibi thêlô liliŋ ba enaŋ, “Inum waiŋ bêŋ anôŋ ba elo molo.”

¹⁴Êŋ ma Pita haviyô hamiŋ aposel laumiŋ ba lahavute malêvôŋ ma halam lôklokwaŋ nena, “Môlô avômalô Islael lôk avômalô takêntêk ba lêk ômô Jelusalem, nodaŋô yenaŋ abô katô. Tem yanaŋ nôm êŋ anêŋ ôdôŋ bêŋ.

¹⁵Lêk ma lôkbôk denaŋ hatôm 9 kilok. Ba intu miŋ nosoŋ nena ŋê êntêk inum waiŋ ba elo molo ami.

¹⁶Mi, nôm êŋ ma hatôm plopet Joel bôk hanaŋ,

¹⁷“‘Wapômbêŋ hanaŋ nena habobo pik lo leŋ anêŋ daŋ ma tem yaŋgasô yenaŋ Lovak Matheŋ êyômô avômalô sapêŋ. Ma nalumi anyô lo avi tem yanêm yenaŋ abô êndêŋ i ba nenaŋ abô êtôm plopet. Ma môlônim apenena tem netulak ba nêgê wêŋ. Ma môlônim anyô boŋnena tem nêgê niaviŋ.

¹⁸Ma tem yaŋgasô yenaŋ Lovak Matheŋ êyômô yenaŋ anyô lo avi ku êndêŋ waklavôŋ êŋ ma tem yanêm yenaŋ abô êndêŋ i ba nenaŋ abô êtôm plopet.

¹⁹Ma tem yandum nômbithi ênjêk leŋ, ma yandum lavôŋiŋ ênjêk pik. Thalaleŋ lôk atum ma atum yova bêŋ tem imbitak.

²⁰Ma wak tem ende i liliŋ ba imbitak momaŋiniŋ, ma ayôŋ tem ende i liliŋ ba imbitak êtôm thalaleŋ. Vêm ma Anyô Bêŋ anêŋ waklavôŋ lôkmaŋgiŋ bêŋ atu tem êlêm.

²¹Ma avômalô takatu ba elam Anyô Bêŋ anêŋ athêŋ, tem nêm i bulubiŋ.’

²²“Avômalô Islael, nodaŋô abô êntêk. Wapômbêŋ bôk hadum ku lôklokwaŋ anôŋ lôk nômbithi ma lavôŋiŋ hathak Yisu anêŋ Nasalet anêŋ baŋ hamô môlô malêvôŋ ba hik thô nena yanida hêv ôpêŋ ba halêm. Ba bôk oyala nôm takêŋ yôv.

²³Ma Wapômbêŋ hatak yani halôk môlô bahemim hatôm bôsêbôk ba lahabi lôk anêŋ auk ek nôm takêŋ imbitak aêŋ. Ma môlô udum ba ŋê kambom ik yani loŋ hathak alovalaŋaŋsiŋ ba hama.

²⁴Ma doŋtom Wapômbêŋ hik yani liŋ ba haviyô hathak loŋbô ba hawa yani vê hêk ŋama anêŋ vovaŋ bêŋ ek malê nena ŋama miŋ hatôm embaloŋ yani loŋ ami.

²⁵Devit bôk hanaŋ hathak yani nena, “‘Yahayê Anyô Bêŋ hamô haviŋ ya wak nômbêŋ intu sapêŋ. Yani hamô habobo ya ba intu miŋ hatôm nômlate esale ya thô ami.