HECHOS 2:6-25

⁶Ora bina diaga ca ruidu que urí zisi ca ra rí ca xpinni Cristu que. Qué ganna ca xi cayaca purti cada tobi de laaca cayuna diaga diidxa gule né.

⁷Bidxagayaa ca ne unaba diidxa saa ca na ca': ―Ñee cadi binni Galilea irá binni ri la?

⁸Peru cayuna diaga nu diidxa gule né pe nu. Xii ndi cayaca pue.

⁹Ne cadi tobi si xquidxi cani nuu rarí'. Nuu binni Partia, binni Media ne binni Elam ne binni Mesopotamia ne binni Judea ne binni Capadocia ne binni Ponto ne binni Asia

¹⁰ne binni Frigia ne binni Panfilia ne binni Egipto ne binni Africa ni nabeza cherica de Cirene, ne laca nuu binni Roma. Caadxi de laaca judíu pe laaca casi laanu, ne xcaadxi la? cadi judíu peru ma rie yu'du stinu.

¹¹Laca nuu binni Creta ne binni Arabia. Peru irá nu cayene nu ni caní' cabe ri' de irá enda nandxó' ni bi'ni Dios, purti cayuna diaga nu ni diidxa gule né pe nu.

¹²Cadxagayaa ca binni que, ne qué ganna ca xi cayaca. Canaba diidxa saa cabe, na cabe: ―Xii ndi cayaca pue.

¹³Peru nuu tu bi'ni burla, ma na naxudxi ca xpinni Cristu que.

¹⁴Oraque biasa Pedru bizuhuaa, laa ne sti once apóstol que, ne uní' ne gana, na: ―Hombre de Judea ca', ne cani nabeza Jerusalén, laucaa diaga ni chi tidxe laatu ri'.

¹⁵Cadi naxudxi di ca binni ri' casi na tu ca, purti deru las nueve ndi',

¹⁶sínuque cayaca ni bicaa profeta Joel chiqué ra na:

¹⁷Na Dios: “Zadxiña dxi ucheeche Espíritu stinne luguiá stale binni. Zusinié ca xiñi gaana tu ne ca xiñi dxaapa tu, ne zuuya cani nahuiini xiixa casi ñaca lu bacaanda', ne zanié nia ca binni gola lu bacaanda'.

¹⁸Ca dxi que zucheeche Espíritu stinne luguiá cani runi xhiiña', hombre ne gunaa, ne zaní' ca ni gabe laaca'.

¹⁹Zune stale enda nandxó' ibá', ne zahuinni seña guidxilayú de rini ne bele, ne ziasa gu'xhu'.

²⁰Zacahui lu gubidxa ne zaca beeu naxiñá rini dxi mayaca idxiña dxi udixhe Dios. Zaca stale cosa de enda ridxagayaa dxi que, ne zusihuinni Dios enda nandxó' sti'.

²¹Ne irá ni inaba gacané Dios laa la? zalá.”

²²Yanna laucaa diaga ni chi tidxe laatu ri', binni Israel ca'. Chi güe nia laatu stiidxa Jesús de Nazaret. Rihuinni Dios biseenda laabe purti laaca tu nanna tu ucané Dios laabe bi'ni be stale milagru ne cosa de enda ridxagayaa ne bisihuinni be seña nezalú tu.

²³Maca nanna Dios xi chi aca be, ne laatu bi'ni tu ni gudixhe Dios gaca que. Unaaze tu laabe, bidii tu laabe ucaa ca binni malu laabe lu cruz. Ne zacá laatu biiti tu laabe.

²⁴Peru bisibani Dios laabe, ulee laabe lu ná enda guti, purti qué ñanda ñaana né enda guti laabe.

²⁵Ndi nga ni uní' David chiqué, ne casi ñaca Jesús caní' ni: Nanna dxi'che qué rusaana Dios naa. Nuu be para gacané be naa ti cadi chuaa xizaa.