Niqiqoosa 15:19-29

¹⁹Yameesafa mi-tamummaqara ufána qímannimiseenoo naríara qinau. Qinée maa-ainainnára írunafa maaqímminoo máridanoo. Ánaamuru máriasa moo máqannaasa quándaki Ánutufinnai ubeekéemariasa sía kadáapi fífau ruanáura.

²⁰Sía misá miqífaqa maasá ákara kai rúmeeqee misá nímianaura. Akaqá ufa maa-ufáusa kai uqannífiqaanaura. Faiqí moó fannoo nárana maraséenoo moo únnaqira Ánutunara innaaru qímasee áminana miqíra nárana sía naaqa. Faiqí ánaasee narí úmmuari narí úmmuarinnanara sía miná máraaqa. Aandáu̱ moó anukakí ataakírarana fidíka káqi maaqínaki márinnana síamma naaqa. Fidíka káqinni tati áqusee amaqí kai naaqa, fidíka sía miná naaqa. Dóo miqí kai qímasee qímannimiaqa.

²¹Aiqáma máaqanna maaqanna máriasa aiqáma Sariríqa Yuda máqannaa amaana máqakina Mooseena sándufa óoqaindari áukuana aukúana ánaamuru ásaana rúmasaidaqa qímannimimariafaqa Mooseena sándufa óosana óosana amaná írifaranoo. Maasá miqí kai íqa ánoona ainaina kai qímannimianaura.

²²Yísuna ufa írimarusa aiqáma Yeerusaree máqusakinaasa Yísuna faiqi námu niqiqoosa faqa faiqí firaasá faqa Yameesana ufa irisée eedóo qímaseeqa qiqau. Maasá qeeqákina akaqáusa suqúmareeqa Baranabasina faqa Pauroona faqa Antiooka máqusa niqiqáifaqa óoqureeqa mi-ufána qímannimiaqeera. Miqí qímaseeqa faiqí moo áuqu Yudasifa miná moo áuqu Barasabasi miná faqa Sirasina faqa mara quqáqau. Aiqámausa miqandára ámiqira fasiqa andeeqáraqandee qímarusa máriqau. Misá miqandá maréeqee Sauroosa Baranabasisa nimiséeqa papiqa ákara rúmeeqee nímiqau.

²³Mi-papiqánaki ufa maaqímminoo márinau. Ínnee Antiooka máqannaa faqa Siria máqannaa faqa Sirisia máqannaa faqa sía ínnee Yuda máqannaafau máriafanoo, ánaamuru míni maqaqoosá máriafanoo maasá Yísuna faiqi námu mifá niqiqoosa faqa faiqí firaasá faqa maasá ínni níkaqaafasaa nífasausamara ínni nímandaidaqa.

²⁴Maasákiqari faiqí akaqáusa nári kai ínnee unnái óoqureeqa fáinanduqira ufa faqa Yuda máqannaasa sándufa óosana óosana faqa qímannimufaqa iriséeqa qaara irirana máraqau. Sía maasá niqiqáafanau óoqu fiqau. Nári íriranannai óoqu fiqau.

²⁵Maasá minára iriséeqa moodáanaki suqúfiqa ufa qímaseeqa Baranabasina faqa Pauroona faqa qaara fasiqa mara quqásaafaqa miqandá faqa ínnee iannai óoqufifaranoo. Minamúsa ínni ufa qímannimiaqeera.

²⁶Baranabasisa Pauroosa sía kúqiranara rufíeemariasa kái paasóosamasee Karaambáiqa Yísuna ásauku mundírafa miná saiká uqéeree maríasa máridaqa.

²⁷Maasá indaarúqaa Yudasina amarána faqa Sirasina faqa ínnee iannai niqiqáanaqa óoqureeqa papiqakinaa ufa nóokiqari qímannimifaqa íriaqa.

²⁸Ánutuna náaquqara maraquna fannoo maasá faqa moodáa karákaimmídanoo. Sía maasá moómoo sándufa ínnisaa quqáanaura. Maa-qaaramoo sandufána kai ínnisaa quqáanaura. Maa-qaaramoo firaa ufa namúna kai ínni nímianaura.

²⁹Faiqí moó fannoo nárana maraséenoo narí moo únnaqira ánutunara dúfi dúfi qímaseenoo ínni níminafa sía miná naaqa minnísaaqa. Ínnee aiqáma aandau fidíka sía naaqa. Ataakirára aandau sía miná amaqí naaqa. Faiqí ánaasee narínni narínni úmmuarirana sía máraaqa. Ínnee máa̱ qinée qúnnainaina sía máreeqa ámiqiranaki márifaranoo. Dóo maa-ufána taikéenoo.