La Bilalaha 15:19-29

¹⁹Tio, e Iakob goio vei loua giteu mago “La gabutatalala taku mai seselele, egiteu la valalua logala, ale egite vuloti la gabutatalala tegiteu soio te La Tahalo Uru, etato umalati ge vimari papai lou egiteu, umalati.

²⁰Eala moli etato ge baha la vikararala soio tegiteu, etato ge vimari moli egiteu veia egite umala ge alali la ilali ale la valalua vaabila soio te la puigolo ale egite lotu tavua. Me egite ge sabebelu taro tai la ilovo te la taulaila. Me egite umala ge alali la kalia ale egite hou molia, egite kama olo la lohola, la kasosola soukama sali tomi, me egite umala ge liliu tai la kasoso.

²¹La merera moli alele eia mamuga sesele, la vuhula etato rovia pala seseleti, karati igoie, oio te la maututula tomi egite veipala la merera te Moses, egite gigi bibibia oilo te la luma la lotu te la haroharo tabu tomi.”

²²Tio, egite goio pou vikapopo, egiteu la bilalaha, me egiteu la mulugaluga, me egiteu la valalua la lotu tomi, egite viputumulia, egite goio toi la tahalo ilua, veia egira ge tilimuli e Pol me Banabas, egite ge goio e Antiok. Egite goio toia taho lua, e Iudas Basabas, me Sailas, la vuhula egira la mulugaluga te la lotu.

²³Egite la bilalaha goio abia giteu la leta, eia vikara maie: Amiteu la bilalaha, amiteu la ururu tomi, amiteu tomi e tabarabara mutou, amite baha la vikararala tamiteu soio tamutou e tabarabara miteu ale logala tamite Iuda, ale pou oio la mautu e Antiok, me oio tai la gale Siria, me Silisia. La haro moli tamutou.

²⁴Amite loloti la merera isa maie, egite isahari loio tamiteu, egite gomai tamutou, egite sula pariri moli amutou te la vikararala tegiteu, me egite igo marapa tai la gabutatalala tamutou. Eala moli amite kama veia giteu mai ele.

²⁵Eala, amite lolo la vikararala mai ele, amite goio vikara vikapopo, la gabutatalala tamite isa moli, eala amite baha taro egira ale taho lua, amite masaga pasi egirua, egira tilimuli e Banabas me Pol, egite gomai tamutoue.

²⁶Egira ale taho luale, egira la tahalo sesele te Iesus Kraist, egira kama gabutatala la igogolu isapolo, eala moli la valolo te la isala moli.

²⁷Eala amite baha taro e Iudas me Sailas ele, veia egira ge vitikumu lou la merera te la letale, me amuto ge rovia veia la merera tamiteu eia sesele.

²⁸Te la pulolou vikapopola tamiteu, amite rovia La Kalulu La Marokala eia pou suli amiteu, amite kisi la vikararala alele, amite kama ge vibukeke le amutou la paga isapolo, ouka, te la vulovulo ale taritigi moli maie:

²⁹Amuto umala alali la kalia ale la valalua vaabila soio te la puigolo ale egite lotu tavua. Amuto umala liliu la kasoso. Amuto umala alali la kalia ale egite hou molia, egite kama olo la lohola, la kasosola soukama sali tomi. Amuto ge sabebelu taro tai la ilovo te la taulaila. Mai amuto ge vibaumuli tigi, me amuto ge vulo taro tomi la vulovulo aleiele, la paga isa ouka, amuto ge taritigi sesele. Eala moli ele.