Ninaedi rina Tinoni 15:9-13

⁹si kaqu ta vala sa vinariponi huiti sapu ka ṉeta kilo palava sapu ta henie karua lita oela olive,

¹⁰turaṉae nia karua lita kolo vaeni tugo. Sa hibina sa vina vukivukihi hie si qetu nia e Zihova.

¹¹Arini sari na hopehopeke vinariponi, saripu kaqu ta vala turaṉae koari na bulumakao kokoreo, sipi kokoreo nomana, na sipi kokoreo hitekena, babe na qoti kokoreo.

¹²Pana soku sari na kurukuru saripu ta vala, si kaqu soku tugo sari na vinariponi huiti na napo padadi sari na vina vukivukihi saripu ta vala.

¹³Sari doduru tie soti pa butubutu Izireli, si kaqu tavetia sapu gua asa, pana valani rini sari na dia vinariponi, sari na hibidi rina vinariponi arini, si qetuni e Zihova.