Ni Gi 22:5-33

⁵Lakea a hariki e Balak i rudu e huriki a vinuru ri gi takia e Balam, e tune Beor bakovi, ge valai ge masia. E Balam i made na tanga e Petor tabukoi na naru e Iupretis, na robo ne huriki a Amav. E Balak i taki e huriki a vinuru vona ri gi takia e Balam ri gi ta maea, “E huriki a bakovi a ngatavine ri pea a robo e Egipto. Ria a tara dagi hateka. Ngane ri made tabukoi ne mia.

⁶Re huriki nga ri gao hateka, i uka ma i kara mi gi rangi ria. I mavonga, i ngaru ioe, go valai go ruduraha ria. Ioe bara o rata mavonga, bara mi vaubi hateka, bara mi rangi ria, mi lili tala ria na malala ne mia. A viri o gamaia bara i made kamumu. A viri o rudurahea bara i bole a vuranga.”

⁷Lakea e huriki a gare ne Moab e Midian ri vano ri gi vakalongo e Balam vona a ngava iea. Ri bole ranga moni ri gi kona e Balam vona, ge ruduraha e huriki a Israel. Ri vano ri bele ne Balam ri takia vona a ngavana hariki e Balak.

⁸Lakea e Balam i taki ria, i ta maea, “Mu mahita na ruma nau na rodo. Bara taki mua vona a ngava e BAKOVI DAGI ge taki iau vona.” Lakea ri mahita vonga.

⁹A Vure i valai ne Balam i nanea, “E rei re huriki ri made turamu?”

¹⁰E Balam i takia a Vure, i ta maea, “E Balak, e tune Sipor, a hariki o Moab i rudu valai ria ri gi vakalongo iau, ri ta maea,

¹¹e huriki a bakovi a ngatavine, ri valai o Egipto ri laho viliha na robo e Moab. I ngaru iau ga ruduraha e huriki a Israel, lakea a Vure ge ratapile ria, ge gao na vabinga ia ge lili tala ria.”

¹²Lakea a Vure i takia e Balam i ta maea, “Naha ni vano turana re huriki a bakovi nga. Naha ni ruduraha e huriki nga, a vuhuna iau a gamai ria pali.”

¹³Na hatelanga e Balam i lakea na gare ne huriki a vinuru ne Balak i ta maea, “Mu hamule mai a robo ne mua. Iau i uka ma ga vano, a vuhuna e BAKOVI DAGI i hatekakari iau.”

¹⁴Lakea e huriki a vinuru ri hamule ri takia e Balak ri ta maea, “E Balam i marikoi ni valai turane mia.”

¹⁵Muri e Balak i rudu e huriki a matakari ri dagi hateka ne huriki a matakari muga,

¹⁶ri lakea ne Balam ri ta maea, “E Balak, e tune Sipor i ngaru go lakea taro vona. Nahea tara maki ge vakapae ioe.

¹⁷O valai bara i habi vomu a maka mahala i kupo, bara i rata a maki lobo o ngaru ge rata. I ngaru ioe go valai go ruduraha e huriki nga.”

¹⁸Pali e Balam i koli i ta maea, “Iau a uka ngava vona e Balak. I ngaru ge habia nau a roho-hariki vona i vonu vona a maka silva, a gol, i uka ma ga lakene, a vuhuna a keri ni longotaro a nitane BAKOVI DAGI a Vure nau.

¹⁹Pali mu mahita na roho nau na rodo, ga dava taroa e BAKOVI DAGI i tahoka ranga ngava ge habi nau o i uka.”

²⁰Na rodo iea a Vure i valai ne Balam i takia, i ta maea, “Re huriki a bakovi nga ri valai ri taki ioe go vano turane ria. I kamumu, o vano turane ria. Pali a ngaru go rata lobo a maka ngava ga taki ioe vona go rata. Naha ni rata tabua tara maki.”

²¹Na hatelanga e Balam i kisia a donki vona, i rike vona, i vano turane huriki a matakari nga o Moab.

²²I tura a bakovi ala rua, ru laho turana. Pali a Vure i tahate hateka ne Balam na tahuna i vano turane ria. Lakea i rudua a agelo ne BAKOVI DAGI ge pesi karia a dala ge hehea.

²³A donki vona i masia a agelo ne BAKOVI DAGI i toto silala a bainat vona, lakea i toni ni polo lele vona. Pali e Balam i hotua a donki vona ge hamule mai a dala.

²⁴Muri a agelo ne BAKOVI DAGI i muga, i pesi kari na dala bala holoholo na kurukuruna a hania na vain i rua. A hania nga ni tura kari na kedo.

²⁵Na tahuna a donki i masia a agelo ne BAKOVI DAGI, i polo lele, i koro na nure, i kapi tatea na nure a vahane Balam. Lakea e Balam i hotu tabua a donki vona.

²⁶A agelo ne BAKOVI DAGI i muga tabu i pesi kari a dala i bala holoholo liu, i uka hini ge polo lele vona na maurina o na kanena a donki.

²⁷Na tahuna a donki i masia a agelo i pesi kari tabua a dala, i mahita puru na dala. Lakea e Balam i madihi tata a hatena, i bolea a lebo i hotua a donki.

²⁸E BAKOVI DAGI i ratea a donki i ta, i takia e Balam i ta maea, “A ra a ratea vomu o hotu iau balaka tolu?”

²⁹E Balam i takia a donki i ta maea, “O rata iau a mata manga a manga lakea a hotu ioe. Iau ga tahoka a bainat bara rabalaki ioe ngane kunana.”

³⁰Lakea a donki i ta maea, “Iau a donki vomu o rike nau na tahuna a karaba vona i valai i harena mona. I hosi, iau a rata maea ioe?” Lakea e Balam i koli i ta maea, “I uka”.

³¹Lakea e BAKOVI DAGI i vakapalalea a matane Balam, i masia a agelo ne BAKOVI DAGI i pesi kari a dala, i toto silala a bainat vona. Lakea i tabuli ngalabarara puru na malala.

³²Lakea a agelo ne BAKOVI DAGI i takia, i ta maea, “I navai o hotu balaka tolu maea a donki vomu? O longo, iau a valai a pesi karia a dala, ga gege ioe, a vuhuna iau i uka ma vivi vomu go vano.”

³³Pali a donki vomu i matai iau i polo lele nau balaka tolu. A donki i uka ma ge polo lele, bara rabalaki ioe pali, pali a donki bara i mahuri.