Ni Gi 20:1-29

¹Na mugana keva e huriki a Israel ri bele na tabeke i ngeki ne Sin, ri made na tanga e Kades. Na tahuna ri tabana ni made o Kades, e Miriam, e kurabane Moses e Aron, i mate, ni tanu vonga.

²Ra hini nga i uka naru, lakea e huriki ri vapopo ri deke ne Moses e Aron,

³ri ta maea, “Mi luhoi, i kamumu, mi gi mate hosi na matane BAKOVI DAGI turane huriki a viri ne mia.

⁴I navai o bole valai mia koea na tabeke i ngeki? O ngaru mia turana a maka sipsip a bulmakau ne mia, mi gi mate koea na malala golea?

⁵I navai o bole tala mia o Egipto o bole valai mia koea na tanga hale, i uka ma i kara mi gi varo a maki ni kani vona? Ra tanga iea i uka vit, i uka kanena kai kamumu, i uka kai a vain. I uka naru koea mi gi ninu.”

⁶E Moses e Aron ru longoa a ngava iea, ru pe e huriki ru vano ru tabuli ngalabarara na matana Kape na Vaponga. A nipara ne BAKOVI DAGI i bele ne rua.

⁷Lakea e BAKOVI DAGI i takia e Moses i ta maea,

⁸“O bolea a kodo. Marua e Aron muru vakalipopo e huriki. Na matane ria o ta lakea na kedo dagi, ge bele a naru. Na naro iea, bara o ratea a naru i bele na kedo. E huriki a bakovi a ngatavine turana a maka sipsip a bulmakau ne ria, bara ri ninu.”

⁹E Moses i ramaia a nita ne BAKOVI DAGI, i vano i bolea na kape a kodo vona.

¹⁰E Moses rua e Aron ru vakalipopo e huriki tabukoi vona ra kedo iea, lakea e Moses i taki ria, i ta maea, “Mu longo valai, mua e huriki a bakovi a ngatavine ni longotaro a ngava. Mu luhoi miri gi bole tala a naru vona a kedo iea?”

¹¹Muri e Moses i toto rike a limana, i ubi balaka rua a kedo na kodo vona. I tua tala na kedo a naru dagi, lakea e huriki turana a bulmakau a sipsip ne ria ri ninu.

¹²Pali e BAKOVI DAGI i taki e Moses e Aron, “Mona marua i uka ma muru luhoi tora iau, i uka ma muru togo iau na matane huriki a Israel. Ngane i uka ma muru gu taparaki lakea e huriki na robo a ta muholi vona ga habia ne ria.”

¹³Ra maki iea i bele na naru e Meriba, ra tanga e Moses i ratea a naru i tua tala na kedo. Na tanga e Meriba e huriki a Israel ri tapuhaki ne BAKOVI DAGI, lakea e BAKOVI DAGI i vakasiri ria, ia i malamala.

¹⁴E huriki a Israel ri made na tanga e Kades, lakea e Moses i rudu ranga vinuru ri gi habi a ngava na hariki o Idom. Ri lokovonga ri ta maea, “Mi taparaki a ngava ne huriki a tara ne mua, re huriki a Israel. Ri taki ioe ri ta maea, Ioe o lohoka vona a maka maregoa i bele ne mia.

¹⁵O lohoka vona e huriki a gare ne mia ri vano ri made o Egipto na pida i kupo. E huriki a Egipto ri rata hale mia.

¹⁶Lakea mi galea e BAKOVI DAGI ge tuhori mia. I longototo mia i rudua tara agelo vona i valai. I tuli tala mia o Egipto, i taparaki valai mia koea. “Ngane mi made o Kades, ra tanga i pesi na harena robo vomu.

¹⁷Mi ngaru go longo ne mia mi gi laho polo vona a robo vomu. Mia turana a maka bulmakau ne mia i uka ma mi gi page dili, mi gi padikudu viliha lae na hania na vit, a vain ne mua, i uka ma mi gi kiru a naru na maka lomu ne mua. Mi gi laho na dala dagi na hariki kunana, mi gi page poloa a robo vomu.”

¹⁸Pali a hariki o Idom i taki e huriki a Israel i ta maea, “I uka liu, naha ni laho polo na robo ne mia. Mua bara mu laho polo na robo ne mia bara si vaubi.”

¹⁹E huriki a Israel ri taki ria ri ta maea, “Mi ngaru ni ramai a dala dagi kunana. Na tahuna mi ninu a naru ne mua o mi vakaninu a bulmakau, a sipsip ne mia, bara mi konea a naru. Mi ngaru ni laho polo kunana na robo ne mua, e ra pali.”

²⁰Pali a hariki o Idom i ta tora hateka i ta maea, “I uka liu, naha ni laho polo.” Lakea a tara ne huriki a Idom ri pagitala valai, ri gi vaubi ne huriki a Israel.

²¹E huriki a Idom ri marikoi e huriki a Israel ri gi laho polo na robo ne ria, lakea e huriki a Israel ri pe mulea e Idom ri ramai a dala tara.

²²E huriki a Israel lobo ri pe mulea e Kades, ri laho lokovonga ri bele na lolo e Hor,

²³na harena a robo e Idom. Ri made vona a lolo iea, lakea e BAKOVI DAGI i taki e Moses e Aron i ta maea,

²⁴“Aron, i uka ma go lakea vona a robo a taki ta ga habia ne huriki a Israel. Ioe bara o mate a vuhuna muru longotaro a ngavagu na naru e Meriba.

²⁵O Moses, o tungari e Aron turane tuna e Eleasar moto sike na lolo e Hor.

²⁶O kali tala a maka bagetua na prister e Aron o vakarodo e Eleasar, a vuhuna e Aron bara i mate vona a lolo iea.”

²⁷Lakea e Moses i ramai a nitane BAKOVI DAGI, i tuli e Aron e Eleasar to sike na lolo. E huriki a Israel ri matai tou to vano.

²⁸Na tahuna to bele meli, lakea e Moses i kali tala a maka bagetua ne Aron i vakarodo e Eleasar, e tune Aron, vona. E Aron i made na lolo i mate. Muri e Moses e Eleasar ru raga puru na lolo.

²⁹Na tahuna e huriki a bakovi a ngatavine ri lohoka vona e Aron i mate pali, ria lobo ri taringia na parava i ravulu tolu.