Namba 22:18-27

¹⁸Mago Bileam gêjô Balaknê sakiŋwaga aweŋ gebe “Silber to gold êsô Balaknê andu e mêŋêc gebe êkêŋ êndêŋ aê, mago jatôm gebe jaŋgêli aêŋoc Apômtau Anôtô nê biŋ ŋagec atomanô.

¹⁹Tageŋ anêc awiŋ aê êndêŋ êmbêc tonec, gebe jajala biŋ ŋagêdô, taŋ Apômtau oc êsôm êndêŋ aê naŋ.”

²⁰Ma gêdêŋ gêbêc Anôtô gêdêŋ Bileam jakêsôm gêdêŋ eŋ gebe “Lau tonaŋ sêmêŋ gebe sêkôc aôm me. Amboac tonaŋ ôndi ma ôsêlêŋ ôwiŋ êsêac. Mago ôŋgôm biŋ, taŋ aê jajatu aôm naŋgeŋ, ŋanô êsa.”

²¹Amboac tonaŋ Bileam gêdi gêdêŋ bêbêc kanucgeŋ. Eŋ kêpô ômbiŋkap kêsêp nê doŋki ma kêsêlêŋ gêwiŋ lau Moab nêŋ kasêga.

²²Mago Apômtau têtac ŋandaŋ kêsa gêdêŋ eŋ gebe eŋ gêdi gêja. Ma Apômtaunê aŋela kêkô intêna auc eŋ, taŋ gêŋgôŋ doŋki ŋaô ma nê sakiŋwaga luagêc sêsêlêŋ sêwiŋ eŋ naŋ.

²³Doŋki gêlic Apômtaunê aŋela kêkô intêna auc ma aŋela kêmêgôm siŋ ŋamata teŋ. Tec doŋki gêwi intêna siŋ ma kêsêlêŋ kêsêp kômlêlôm. Tec Bileam gêjac eŋ gebe êmu êsa intêna êna êtiam.

²⁴Go Apômtaunê aŋela jakêkô intêna gasuc-gasuc, taŋ kêsa kôm wainŋa ŋalêlôm naŋ, gebe tuŋbôm kêkô intêna makeŋ-makeŋ.

²⁵Doŋki gêlic Apômtaunê aŋela, tec jagêjac tuŋbôm ŋamakeŋ e kêkapiŋ Bileam akaiŋ tôŋ tamiŋ tuŋbôm, tec Bileam gêjac eŋ kêtiam.

²⁶Go Apômtaunê aŋela gêmuŋ gêja kêkô gamêŋ, taŋ intêna ŋasawa kêtu sauŋ naŋ, ma ŋasawa teŋ gebe doŋki êmôniŋ êsa anô me gasêŋa gêc atom.

²⁷Doŋki gêlic Apômtaunê aŋela, go gêu tau kêsêp jagêc. Ma Bileam têtac ŋandaŋ kêsa ma gêjac doŋki ŋa nê tôc.