Nabasi 24:7-10

⁷Ro aesakae buone fuka ve uruvana daga uifari buone ije buka irere boeje bu vierafeva ije kedufuo. Ro kuke Kini buone fuka Kini Agagi asina ka e daroki rega e buka fukiro e fuone fu samuagiamo ijadufuo kame aroriake.

⁸Buje bu Godire Ijifiti ijia kaenamiana keke ruae. Ro kuke fure daro miaga buka mave-kau kumate baego igege e ani buone ije iraraena kaniavo. Ijadufuo bure e aesakae gue bu buina bijaekuva buka bure iraraena juvuave buone ijia kame bijiana ane tuasedufuo.

⁹Ro izege fanu raejoni fu e sakikiro saui namo igege E Isureroko ije buka e ani buone kaniakuae samua karinoevo. Ijadufuo fu erare bu kame niediakuma baki. Ro eranebe bu e Isureroko ifejiana marejiavo ije Godire bu marejiake. Ro eranebe bu e Isureroko kame isekafiavo ije Godire ve una bu kame isekafiakono kuae.

¹⁰Berame fu ijiege kuaena e Isureroko ije daro miamoga Beraki fu ije gamo fuka ma ireobo defarui. Ijadufuo fu uri ubaeje sakinamikinu Berame kuae, Na aeje na kua a e ani none ije kuravajiano kuae rove aka maza inokubeke una bu daro miae.