Näni Cægaïnö 13:45-48

⁴⁵Nanguï ïnäni mänömaï pönäni ate wædinque oodeoidi guiquënë pïinte badinque, Babæ ante änewengampa, ante Pabodo ingante godö pïinte tedewënänitapa.

⁴⁶Mänömaï tedewëñönänite Pabodo tönö Bedënabee wæætë guïñënedämaï inte apæ̈nedatapa. —Mïnitö oodeoidi ïmïni inte edæ täno ëñencæmïnimpa, ante cædinque mönatö Wængonguï nänö änö ante edæ mä apæ̈nedinque mïnitö ïmïnite täno apæ̈nequënëmöna intamönapa. Mïnitö ïñæmpa mïni cöwë wæ̈nämaï quëwenguïnö ante apæ̈neyömöna mïni apænte pangä wæquinque edæ Baa ämïnipa. Ante wæmöna inte mönatö ñöwo ëmö cæte godinque edæ oodeoidi ïnämaï ïnäni weca edæ apæ̈necæ gomöna tamëñedäni.

⁴⁷Mönitö Awënë ïïmaï ante mönatö ïmönate angacäimpa. “Quëwencæmïnimpa, ante botö cægaïnö ante bitö inguipoga tömämæ mäo apæ̈nedinque Oodeoidi ïnämaï ïnäni beyæ̈ tica ënente baï cæcæbiimpa, ante cædinque botö bitö ïmite da godömo apæ̈necæ gocæbiimpa.” Ante në apæ̈negaingä inte Wængonguï mönatö ïmönate angä ëñente apæ̈nemönapa.

⁴⁸Mänömaïnö ante apæ̈neda ëñëninque oodeoidi ïnämaï ïnäni ïñömö, Awënë nänö apæ̈nedö waa ëñëmönipa, ante watapæ̈ apæ̈nedänitapa. Ayæ̈ mönö Awënë doyedë apæ̈nedinque, Mänimpodänique wede pönëninque cöwë wædämaï quëwenguïnäni incædänimpa, ante tömengä nänö në angaïnänique ñöwo pönënänitapa.