MII GUN MIINU MO 16:1-9

¹Dhali a’di p̱u’dki’d si’da/ mo e Pan Darba mo dhali e Pan Lisṯra mo dhali hili ma, amanciḵ gwoŋ kamu/ diki’di mun jin yuḵkunu ka Ṯimuṯẖawuus mo jin ta ya/ ma ’bom gi ’Kwani Yahuuda/ mo jin gamki gwo is mo hili com ta Wathiŋ Griḵi mo be.

²A’di yansan maŋkunu mo e bwam ma waḵ jin di’d e Pan Lisṯra mo dhali e Pa Ikuuniya mo be.

³A’di min ma Buulus i’taki ŋap̱ mo mmosus nyaḵki a’di mo dhali a’di bu’thki a’di mo dhali ’ciṯẖki a’di amunyjal yis piti mo gom ’Kwani Yahuuda/ kun ’kon e pa gwaṯṯaan mo haali/ uni ’baar mo mishkin ki com ta Wathiŋ Griḵi mo be.

⁴Dhali mmo/iina uni mo ki bway buni ki tur mo mmo’ciṯẖ bampa/ mo tani uni c̱iki uni gwoŋḵan yan mo mmodhu kun gama imandhunu ki she/ me’d mo dhali ’kwaniŋ gwanyjaḵa/ si’da/ kun ’kon e Pa Urushaliim mo be.

⁵Wakan si’da/ ’kwaniŋ ḵaniisa ’bi’thkunu is mo e moŋgam gwo is mo dhali markunu is ka yempa/ mo be.

⁶Dhali uni iikin ki tur mo e mo ka kukul is mo e Pam P̱arijiyya mo dhali Paŋ Ghalathiyya mo mmononkina Shi/in Dheleladhelel uni ’kup̱ mo mmo/o gwo yan e Pa Asiyya mo be.

⁷Dhali ki uni iin ka ḵarambuye/ i Pam Misiyya mo tani uni palki mii mo mmo/ii ntagi Pam Biṯẖiniyya mo dhali Shi/in ma Yesus diki dhal uni bway mo be.

⁸Dhali mmokalkina uni Pam Misiyya mo tani uni iikin ka luŋgu’b mo e Pan Ṯaruwaas mo be.

⁹Dhali tonyjan piki’da Buulusi is mon’thiny mo a’di jin ta wathi/ gi Pam Makiduniyya mo jin diki’d mmodosh mo mmoyuḵ a’di mo dhali o gwo mo ki: Yayu/ ma mmo’ciṯẖa/ gapa e Pam Makiduniyya dhali woṯẖ aman mo ma.