Menge Ininang 5:14-38

¹⁴Migkedita se otaw nemenal diyà te Pengolo. Doen meama aw bayi heman nekeakop diyà te otaw egpemenal ki Jesus.

¹⁵So doen kepelahan ininang te menge sogounun i Cristo, inibing te doma se otaw doen mesakit doton te lowà te menge balay. Insawol dan se kama aw ikam te otaw doen mesakit doton dapag te dalan amon keelongan dan i Pedro so ibeg dan kegolian.

¹⁶Dimoton te Jerusalem se medita otaw tikedo te menge doma lonsod medapag kidoen. Nengibing dan te menge otaw doen mesakit aw doma otaw pigdetengan te bosaw. Negolian se kedita te otaw nesekitan, aw impelowà se bosaw lekat te doma.

¹⁷Nayan, ontò neopal se ontò pengolo te simbahan aw menge otaw ketondog kandin, yan se menge Sadusiyo. Miningà dan te menge sogounun i Cristo aw

¹⁸impedakep dan. Penga niyan, kineleboso dan.

¹⁹Meneng pegkedelem niyan, inowang te anghil te Timanem se tetakep te keleboso aw impelowà din dan. Doen impunù din kandan, kagi din,

²⁰“Doton kaw te dakel simbahan. Peg-indan kaw te menge otaw tepad te kaling pedowan ibegay te Timanem kandan.”

²¹Peglibtak te aldaw, minawop se menge sogounun i Cristo doton te dakel simbahan aw todà dan migtoladà. Dalem niyan, migtipon se ontò pengolo te simbahan, aw menge otaw neketetondog kandin, aw kedita te doma obanen te simbahan. Impeangay dan se sogounun i Cristo lekat te keleboso.

²²Meneng pegdateng te otaw insogò doton te keleboso, wedad den dan kidoen. Penga niyan, limikò dan doton te menge obanen netipon aw minikagi dan,

²³“Pegdateng day doton, netakep pa se keleboso, aw egtonggò pa se sondalo. Meneng peg-owang day te tetakep, wedad den dan kidoen.”

²⁴Mondà netaga-taga se menge pengolo te simbahan aw kapitan te polis egtonggò te dakel simbahan, ontò migkebulung se aneng-aneng dan aw kenan den se menge sogounun i Cristo.

²⁵Penga niyan, dimateng se sebad otaw kidoen kandan. Minikagi sikandin, “Se menge otaw kineleboso niyo gebenini, kidoen den dan te dakel simbahan aw migtoladà dan.”

²⁶Penga niyan, dimoton se polis aw kapitan dan amon mangay dan te sogounun i Cristo. Wedà pegleges se polis kandan so nelemitan dan aw bontogan dan te menge otaw te bato.

²⁷Peg-ibing dan kandan doton te menge obanen netipon, minikagi se ontò pengolo te simbahan,

²⁸“Kedengan, migpunù kay kenyo te eked kaw palos pegtoladà tepad te otaw egtekingan niyo. Meneng wedà kaw tolò, so songkani, netaga-taga se kedita te otaw dini te Jerusalem te intoladà niyo. Eg-ikagi kaw heman te sikami se otaw migpeimatay te egtekingan niyo.”

²⁹Nayan, timaba si Pedro aw menge doma sogounun i Cristo, “Pengkey megsagda kaw kenami, meneng eked kay lengà, so Timanem se toloen day.

³⁰Se Timanem sineligan te kemonaan tadon, yan se simogò ki Jesus dini te tanà. Meneng impeimatay niyo sikandin inlansang diyà te kros.

³¹Penga niyan, inantay sikandin te Timanem metolos aw ininang din melangkaw doton te langit, so sikandin se lomowan kenitadon aw megpelowà kenitadon lekat te salà. Ibeg din megselsel kaw te salà amon pegwedaden din se salà niyo.

³²Mig-indan kay te benal iyan neinang so impeikagi kay te Espiritu Santo, sìyan ibegay te Timanem diyà te kedita te otaw tomolò kandin.”

³³Pegdineg dan kenyan, ontò den neopal se pedowan dan, aw ibeg dan imetayan se menge sogounun i Cristo.

³⁴Meneng doen sebad Parisiyo egtoladà te punù ingkeliwat i Moises si Gamaliel. Egsegmanen sikandin te menge doma otaw. Timindeg sikandin amon mikagi, meneng onà din impelowà se menge sogounun i Cristo dalem te peg-ikagi din.

³⁵Penga niyan, minikagi si Gamaliel diyà te menge doma din netipon, “Menge kedomaan ko bowad-bowad i Israel, peg-imanday kaw aw eden se inangen niyo diyà te menge otaw sìyan.

³⁶Kedengan, doen sebad otaw iningedanan ki Teudas meibeg megkedakel otaw, aw menge epat gatos se otaw timaking kandin. Meneng inimetayan sikandin, aw penga niyan nebilit se otaw timaking kandin, so wedad den mengibing kandan.

³⁷Pegbilang te gobirno te kedita te otaw, doen heman tege Galiliya si Judas. Pengkey medita heman se otaw timaking kandin, meneng inimetayan sikandin, aw yan nebilit se otaw timaking kandin.

³⁸Nayan, ikegiyen ko kenyo te mèpiya aw pebeyaan tadon se menge otaw seini, aw ipekesayo tadon dan olò. Pebeyai niyo sikandan, so aw kenà Timanem se simogò kandan, yan wedad detengan te eg-inangen dan.