Menge Ininang 27:3-35

³Keeldawan niyan, minapit kay doton te Sidon. Neidowan i Julio si Pablo, aw yan timenà sikandin aw miglegeana diyà te menge otaw egpemenal kidoen, aw sinagman dan sikandin.

⁴Pegsakay day lekat te Sidon, minokit kay doton te keselibengan te kelamag kidoen te dibaloy te polò iningedanan Sipro, so wedà kay pekesongsong.

⁵Minokit kay doton te lawod te Silisya aw Pampilya. Timenà kay doton te Mira, sebad lonsod kidoen te Lisya.

⁶Netelaan i Julio se sebad pangkò doen dedakel layag meneng wedad katig. Dimateng se pangkò lekat te Alejandriya megpesalo doton te Italya, aw yan se sinekayan day lekat te Mira.

⁷Ontò meloway se kagnan day, aw nenamay se pegdateng day doton te Ngido, so wedà kay pekesongsong te kelamag, aw yan minatas kay doton te polò iningedanan Kreta. Minokit kay medapag te Ponta Salmon, so ontò mebandes se kelamag kidoen.

⁸Minokit kay medapag te enay, meneng nelimahan kay pa, aw nenamay kay dimateng doton te Mèpiya Dedongan medapag te lonsod te Lasya.

⁹Tandà te kenamay te sinekayan day, neobos den se aldaw te pegpowasa, aw ontò melima se peglowà te belangay. Yan minikagi si Pablo,

¹⁰“Aneng-aneng ko, ontò kidon kelimahan aw domeleg kidon, so kebàtan besi se pangkò aw lolan niyan, aw megelà kidon besi heman.”

¹¹Meneng wedà penenalan se serhinto ki Pablo, so simalig sikandin diyà te egpengibing aw tig-apò te pangkò sìyan.

¹²Aneng-aneng dan, kenà ontò mèpiya se dedongan sìyan dalem te pengodan. Yan se doun te keditaan te otaw simakay meibeg mesayo doton te Fenis, sebad lonsod te polò sìyan digsel te egselepan te aldaw, so ibeg dan meg-ogpà kidoen dalem te pengodan.

¹³Pegdateng te pasbang, eden dan aw mekebatog dan domeleg doton te Fenis. Yan linakon dan se pondo, aw minokit kay medapag te kilid te enay te polò sìyan.

¹⁴Meneng wedà kenamay, ontò migkebandes se kelamag lekat te polò, so dinetengan kay te dakel odan aw dakel balud.

¹⁵Neibing se pangkò te kelamag, so wedà kay pekesongsong. Yan tininggetanan day se kelamag aw neibing kay.

¹⁶Pegdateng day doton te deitek polò iningedanan Kawda, tabag melinaw kidoen. Ontò melima se peglolan day te deitek boti.

¹⁷Pegkepenga niyan, inigot dan heman se getan te pangkò te lobid amon eked kebàti. Nelemitan dan aw idagsà se pangkò doton te abas iningedanan Sirte doton te Libya. Yan linolon dan se layag aw neketaking kay te kelamag.

¹⁸Keeldawan niyan, ontò pa medaet se dagat. Yan in-agbel day se lolan amon eked kay keteled.

¹⁹Pegdateng te iketelo te aldaw, in-agbel day se telepagan te pangkò sìyan.

²⁰Ontò nenamay wedà kay pekekità te aldaw aw bitoen. Aneng-aneng te kedita day, eked kay peketayod, so timetoo pa se odan aw kelamag ontò medaet.

²¹Ontò nenamay wedad kinaen day. Meneng timindeg si Pablo aw minikagi, “Menge doma ko, mèpiya peden aw timolò kaw te inikagi ko kenyo te eked kidon kesayo lekat te Kreta, amon eked kebàti se lolan aw wedad kelimahan tadon.

²²Na, mikagi a diyà kenyo, peseligi se pedowan niyo, so wedad otaw melemes, meneng olò pangkò se kebàtan.

²³So tengà te delem, doen anghil migpekità diyà kanak insogò te Timanem egsimbahen ko aw migsakop kanak.

²⁴Minikagi sikandin, ‘E Pablo, ikà egkelemitan, so metoman ka komità ki Cesar aw osayan ka din doton te Roma, aw yan minikagi se Timanem te eked kematay se otaw simakay doma nikaw.’

²⁵Nayan menge doma ko, peseligi se pedowan niyo. Egsalig a te Timanem te metoman se kedita te kagi din kanak.

²⁶Meneng idagsà kidon doton te sebad polò.”

²⁷Pegkepenga te dowa simana, gayed kay pa impalid doton te dagat iningedanan Adriya. Tengà te delem, dinineg te gormiti se balud, aw netegahan day te medapag den se kilid te enay.

²⁸Penga niyan, intonton dan se lobid amon tendaen se kedalem te dagat. Kelowan depa se kedalem niyan. Wedà kenamay, todà dan tinandà aw sempolò teg lima depa se kedalem niyan.

²⁹Nelemitan kay aw idagsà se pangkò doton te abas. Yan indagdag dan se epat pondo lekat te olin, aw migtawal-tawal kay te meketayod kay lamig te peglibtak te aldaw.

³⁰Intonton te menge gormiti se deitek boti doton te dagat, so migpelingo-lingo dan te megdagdag dan te pondo doton te dolong, amon komadas dan lekat te pangkò sinekayan day.

³¹Meneng minikagi si Pablo diyà te menge sondalo aw serhinto, “Eked kidon apet doton te enay singed aw meg-ogpà dan dini kenitadon.”

³²Penga niyan, binogtò te menge sondalo se lobid in-iket te deitek boti amon idagsà.

³³Mata-mata te iselem, minikagi si Pablo te mèpiya aw komaen dan. Kagi din, “Sempolò teg epat pa se aldaw migtagad kaw, aw netegahan ko te binallos kaw, so wedad nael kinaen niyo.

³⁴Yan kaen kaw amon megkagsen kaw. Ikà niyo egkelemitan, so wedad otaw melemes aw kepelian.”

³⁵Penga niyan, inabat i Pablo se pan, aw migpesiontong diyà te Timanem, aw pigbelà-belà din se pan, aw kimaen.