Mbouŋ to Yes Israela 7:1-8

¹Yoova, yom Maaron tiou. You nayooŋ ilat tiom. Ndiran samsamia tigham taghon ghou tighaze tiwaghamun ghou. Uul ghou ve ugham mulin ghou ila nimadi.

²Pa vene, tirab ghou, ve tiwaghamun ghou inimale laion isaas motin tamtoghon, le ŋgiira ŋgiira. Pasa, leg itag ite eta pa igham mulin ghou maau.

³O Yoova, Maaron tiou, ndiran to tighaze tigham samin ghou, you nagham sosor eta padi maau.

⁴Tamtoghon to yeiŋa nimbua saveeŋ pa nilup ghei ninim ee moghon, you nagham ŋgar samia eta padi maau. Ve yes to tighur koi payou sorok, you nayub mbeb todi eta maau.

⁵Ighaze you nagham sosor tovene, nene poia pa koiagŋa tigham taghon ghou ve tikis ghou, ve tivazag ghou ila taan, ve nagheen izala ghavuur.

⁶Yoova, umundig toman atem yabyab, ve ureu koiagŋa. Pasa, atedi yabyab kat payou. Maaron tiou, umundig rikia moghon ve uul ghou. Ughur atia iŋarua koiagŋa pa ŋgar to tighami.

⁷Uyou tamtoghon tisob tila tilup di ila naghom. Uneep ila inam to ghamuuŋ pooz izi ndug sambam, ve ugham pooz padi.

⁸Yoova, yom uŋgabiiz tamtoghon to ndug ndug, ve ughur atia padi. Uŋgabiiz ghou ve upaghazoŋan ghou ila tamtoghon matadi, leso tiwatag tighaze you ŋgeu deŋiag, ve gabuag toman ŋgar tiou isob, nene poia moghon.