Mbouŋ to Yes Israela 78:8-19

⁸Leso tigham ŋgar inimale nditimbudi sob. Pasa nditimbudi, ŋgar todi iyaryaaŋ kat. Lolodi pa titoor ŋgar todi maau. Moghon moghon tighamgham didiaaŋ, ve tizorzoor Maaron aliŋa. Lolodi ineep tuŋia ila toni maau. Ve saveeŋ to yesŋa Maaron timbua, titaghoni maau.

⁹Papaghu to Epraim, yes tiraua kat pa tivaneg pa pane. Eemoghon sawa to malmal imundig, timatughez ve tighau.

¹⁰Ve saveeŋ to yesŋa Maaron timbua, matadi kisini ve titaghoni maau. Laghooŋ todi, lolodi pa titaghon tutuuŋ toni maau.

¹¹Ve uraat tintina toman mbeb gharatooŋadi to muuŋ Maaron ighamgham di ila matadi, lolodi imaagh pani kat.

¹²Sawa to nditimbudi tineep izi Isip, Maaron igham mbeb gharatooŋadi tintina izi taan raapa to Zoan, ve tighita pa taudi matadi.

¹³Ve sawa to tila tivot izi Te Kaviaaŋa, ye ivalag te le pida ila pa ŋas, ve pida ila pa waan. Ye igham te iyoon inimale didiiŋ. Tauto ataam ivot padi, ve titaghoni tivool tila pa dige ite.

¹⁴Ndag, ye igham yaghur tae ivot, leso ipatooŋ di pa ataam. Ve mboŋ, ye igham yab ivot, leso imuuŋ padi ve titaghoni.

¹⁵Sawa to tineep izi ndug balim, Maaron irab balagin yaam, ve igham ya ireer ivot pani. Ye igham ya ireer tiina, leso tighun.

¹⁶Onoon kat, ye igham ya katindi tivot ila yaam, ve tireer tizi le tinim ya tintina.

¹⁷Eemoghon yes tinoknok ghamuuŋ sosor pa Maaron Tiina To Ilib Pa Ndimaronŋa Tisob. Sawa to tilaghlaagh izi ndug balim, tizorzoor aliŋa.

¹⁸Yes titovtoov Maaron tapiri. Tauto tisaav pani tighaze igham adi aniiŋ to luadi itaŋtaŋ pani.

¹⁹Ve tiveleg Maaron tighaze: “Laak, Maaron tapiri irau igham amai aniiŋ izi ndug balim tonene? Onoon, ye irab balagin yaam, ve ya tiina goŋia ivot toman tapiri, ve ireer izi. Eemoghon irau igham tamtoghon toni adi aniiŋ toman ziga?”