Mbouŋ To Yes Israela 139:18-24

¹⁸Isaav ighe natoova to nanin zi, ene narao mako. Tiliiv sausau to nari. Mboŋ, matag iŋgalŋgal ghom tauvene ila le nughizau, ra naburig ve naghilaal naghe yo ulepleep tomani ghau.

¹⁹O Maaron, yau naghe yo urav zeran sasaghati tisov timataar, o poia! Ve yes tau tiliŋliŋ siŋ pa tamtamon na, upaghau zi tila soghan payau.

²⁰Koiamŋa tawe, tighamgham ŋgar sasaghati naol ila yo ezam. Tiwatwaat ezam sorok to tipariaaŋ karom toozi.

²¹O Yoova, yes tau tighurghur koi payo na, yau paam naghurghur koi pazi. Ve yes tau tizorzoor ghom na, lolog pazi rigta mako.

²²Yau naghurghur koi pazi, ve naghit zi timin koiagŋa kat.

²³O Maaron, ugabiiz lolog ve ŋgar tsiau. Utoov ghau, leso uwatagh katin ŋgar tau igheen ila lolog ne. Utiir poghani ghau ve ughita: Ŋgar saghati eta igheen ila lolog, ma mako?

²⁴Isaav ighe yau nasosor pa eez tsio, na upaduduuŋ ghau. Leso nataghon duduŋaini, ve naleep poia taghon taghon gha ila. Eez tawe, igheen ta muuŋ ve ilam.