Mbouŋ to Yes Israela 119:34-106

³⁴Upaghazoŋan ghou pa saveeŋ tiom ŋgara. Leso matag kisini, ve nataghoni toman lolog irau sawa isob.

³⁵Umuuŋ ve upatooŋ ataam payou, leso nataghon tutuuŋ tiom. Pasa, ataam tonenen to igham lolog poia le poia kat.

³⁶Upamundigin lolog, leso nataghon ataam to yom ughuri payei, ve nagham ŋgar pa ndouŋ leg mbaliiŋ to taan sob.

³⁷Upaghau matag pa mbeb soroksorok to taan to anoŋadi maau ne, ve upalot ghou pa nataghon ataam tiom. Leso naneep matag iyaryaar.

³⁸You mbesooŋa tiom. Tovenen matam iŋgal saveeŋ mbuaaŋ tiom, ve ugham anoŋa ivot payou. Saveeŋ tiom tonenen iŋarua tamtoghon tisob to timatughez payom ve titaghon ŋgar tiom.

³⁹Saveeŋ samia to koiagŋa tipiyaava payou, nene igham ghou namatughez. Pasa, ighaze tamtoghon tighur ila saveeŋ todi tonowen, nene pale mayag. Tovenen utatan saveeŋ todi, leso tamtoghon tighur ila sob. Pasa, ataam tiom to gabizooŋ tamtoghon, nene deŋia moghon.

⁴⁰O Yoova, you naghaze nataghon tutuuŋ tisob to yom ughur di. Tovenen utaghon ŋgar tiom deŋia, ve ugham ghou naneep matag iyaryaar.

⁴¹O Yoova, you nawatag: Yom lolom ineep tuŋia ila to tamtoghon tiom ve uluul di. Upatooŋ ŋgar tonanan payou paam, ghoro poia. Tovenen ugham mulin ghou pa pataŋani tiou itaghon saveeŋ mbuaaŋ tiom.

⁴²Leso you irau napamuul saveeŋ velegiiŋ to tipiyaava payou. Pasa, you naghur ila saveeŋ tiom.

⁴³You naghur matag pa gabizooŋ tiom. Tovenen uul ghou lak! Leso avog ivotia gabuam to avom onoon ve utaghon saveeŋ tiom irau sawa isob.

⁴⁴You pale nataghon saveeŋ tiom irau sawa isob. To aazne, ve itaghoni taghoni gha ila.

⁴⁵Tutuuŋ to yom ughur di, you nazuaria ghou pa nataghon di. Tovenen mbeb eta irau ipoon ataam payou maau.

⁴⁶Ataam to yom ughuri payei, you pale navotia ila yes kinik matadi paam. Pasa, you namatughez, ma mayag pa tamtoghon eta maau.

⁴⁷Tutuuŋ tiom to naol ne, tigham lolog poia le poia kat. Tauto lolog padi kat.

⁴⁸You lolog pa tutuuŋ tiom to naol ne ve napatab padi. Tovenen nakaak nimag, ve napait ghom pa tutuuŋ tiom. Tutuuŋ tiom naol to tineep pataghaaŋ, matag itaghon di naghaze nagham ŋgar padi pooi.

⁴⁹You mbesooŋa tiom. Matam iŋgal saveeŋ to umbua toman ghou. Pasa, saveeŋ tiom tonowen ipapalot ghou pa naghur matag payom, ve nasaŋan ulaaŋ tiom.

⁵⁰Ighaze pataŋani igham ghou, nene pale saveeŋ tiom iuul ghou ve naneep pooi. Ŋgar tonene, to irab ateg le ateg izi.

⁵¹Yes to tipapait taudi ve tiveleg ghom, moghon moghon tiveveleg ghou paam. Eemoghon you napul murig pa saveeŋ tiom maau.

⁵²O Yoova, matag iŋgalŋgal sawa naol to muuŋ uŋgabiiz tamtoghon ve ughur atia padi. Tauto ipalot ghou, ve igham ateg izi.

⁵³Ighaze naghita ndiran samsamiadi tipul muridi pa saveeŋ tiom, nene igham ghou ateg yabyab kat.

⁵⁴Taan tonene, you naneep pani nanim loom moghon, ve natoor mbouŋ katindi pa tutuuŋ tiom naol to tineep pataghaaŋ.

⁵⁵Yoova, matag iŋgalŋgal ghom pa mboŋ paam, ve nataghon saveeŋ tiom.

⁵⁶You gabuag tovene: Tutuuŋ to yom ughur di, matag kisin di ve nataghon di irau sawa isob.

⁵⁷Yoova, you naghita ghom unumale mbeb tau. You naneep ilat tiom. Unumale taan poia eez to tipuli payou pa naneep pani. You nambua saveeŋ payom naghaze you pale nataghon aliŋam.

⁵⁸Taŋiiz tiou iŋarua ghom toman lolog: Lolom isamin ghou, ve ughur poia tiom iza tiou itaghon saveeŋ mbuaaŋ tiom.

⁵⁹You naŋgabiiz laghooŋ tiou naghaze nene deŋia maau. Tauto natoor ŋgar tiou, ve naghaze nataghon ataam to yom ughuri payei.

⁶⁰Ve irau nasaŋan maau. Pale rikia moghon ve nataghon tutuuŋ tiom.

⁶¹Ndiran samsamia tighur liis naol pa tighaze tiliis ghou. Eemoghon irau lolog imaagh pa tutuuŋ tiom maau.

⁶²You namundig pa mboŋ anoŋa, ve napait ghom. Pasa, ataam tiom to gabizooŋ mbeb, nene deŋia moghon.

⁶³Yes to timatughez payom ve titaghon ŋgar tiom, you lolog padi, ve nagham di tinim nditag.

⁶⁴O Yoova, yom lolom ineep tuŋia ila to tamtoghon tiom ve uluul di. Ŋgar tiom tonanan, yom upatooŋa irau taan isob. Upaghazoŋan ghou pa tutuuŋ tiom naol to tineep pataghaaŋ, leso nawatag di kat.

⁶⁵O Yoova, you mbesooŋa tiom. Yom ughamgham poian ghou kat itaghon saveeŋ mbuaaŋ tiom.

⁶⁶You naghur ila naghaze tutuuŋ tiom to naol ne, nene popoiadi moghon. Tovenen upatooŋ ghou pa ŋgar poia ve ataam to naŋgabiiz poian mbeb.

⁶⁷Muuŋ, you nayel pa ataam tiom. Eemoghon yom ulos ghou ve upasaluŋgan ghou, tauto aazne, matag kisin aliŋam ve nataghoni.

⁶⁸Yom poiam kat. Ve ŋgar to ughamgham di ne paam, popoiadi moghon. Upaghazoŋan ghou pa tutuuŋ tiom naol to tineep pataghaaŋ.

⁶⁹Yes to tipapait taudi ve tiveleg ghom, tiŋgal saveeŋ kaarom payou, ve tiwaghamun izag. Eemoghon matag kisin tutuuŋ to yom ughur di, ve nataghon di toman lolog.

⁷⁰Ndiran tonowen ledi ghilalooŋ rita maau. Eemoghon you, saveeŋ tiom igham lolog poia le poia kat.

⁷¹Pataŋani to muuŋ igham ghou, nene poia. Pasa, ipasaluŋgan ghou, ve ipamundigin ŋgar tiou pa tutuuŋ tiom naol to tineep pataghaaŋ.

⁷²Saveeŋ to ivot ila avom, you naghita inimale mbeb tau. Ilib pa yaam silva ve gol ndiŋndiŋ ndiŋndiŋ.

⁷³Taum nimam igharaat ghou, to navot. Tovenen upaghazoŋan ghou pa tutuuŋ tiom to naol ne, leso nagham ŋgar padi pooi.

⁷⁴Yes to timatughez payom ve titaghon ŋgar tiom, ighaze tighita ghou, nene pale lolodi poia. Pasa, you naghur ila saveeŋ mbuaaŋ tiom, ve naghur matag naghaze naghita anoŋa ivot.

⁷⁵O Yoova, you nawatag: Ataam tiom to gabizooŋ tamtoghon, nene deŋia moghon. Ve yom utaghon saveeŋ mbuaaŋ tiom irau sawa isob. Tauto ulos ghou pa upasaluŋgan ghou.

⁷⁶Yom lolom ineep tuŋia ila to tamtoghon tiom ve uluul di. Upatooŋ ŋgar tovene payou paam itaghon saveeŋ to yom umbua toman ghou. Leso urab ateg, ve upalot ghou. Pasa, you mbesooŋa tiom.

⁷⁷Lolom isamin ghou, ve uul ghou naneep pooi. Pasa, saveeŋ tiom, tauto igham lolog poia le poia kat.

⁷⁸Yes to tipait taudi ve tiveleg ghom, tinoknok ŋgaliiŋ saveeŋ kaarom payou. Utatan di, ve ugham di mayadi. Eemoghon you matag itaghon tutuuŋ to yom ughur di naghaze nagham ŋgar padi pooi.

⁷⁹Yes to timatughez payom ve titaghon ŋgar tiom, ghoro tinim tiou ve yeiŋa nilup ghei. Pasa, ndiran tovene tiwatag ataam to yom ughuri pa tamtoghon tiom.

⁸⁰You naghaze ŋgar to ineep ila lolog ne, eta isosor malep, ve nataghon katin tutuuŋ tiom naol to tineep pataghaaŋ. Leso mayag sob.

⁸¹O Yoova, you nakaria saŋaniiŋ pa ulaaŋ tiom, le tapirig isob kat. Eemoghon you naghur ila naghaze aliŋam pale ighur anoŋa.

⁸²You naghur matag naghaze naghita saveeŋ mbuaaŋ tiom anoŋa ivot. Eemoghon nasaŋan le maau. Pale ŋeez o uul ghou ve ateg izi?

⁸³You nasami, ve tamtoghon lolodi imaagh payou wa. Tighita ghou nanimale buzbuz. Eemoghon tutuuŋ tiom naol to tineep pataghaaŋ, lolog imaagh padi maau.

⁸⁴You mbesooŋa tiom. Pughu vena to yom umbabatut koiagŋa, ve tighamgham pataŋani payou? Pale ŋeez o uŋgabiiz di, ve ughur atia padi?

⁸⁵Ughita. Yes to tipapait taudi ve tiveleg ghom, titai saambu payou tighaze natap nazila. Ndiran tonowen titaghon saveeŋ tiom maau.

⁸⁶Tutuuŋ tiom tisob, popoiadi moghon. Tovenen yei irau ninumeer di pa tipasaluŋgan ghei. Aazne, tamtoghon tighur pataŋani payou sorok. Tovenen uul ghou lak!

⁸⁷Pasa, mala maau pale tipasob nepooŋ tiou to taan. Eemoghon tutuuŋ to yom ughur di, you napul murig padi maau.

⁸⁸Yom lolom ineep tuŋia ila to tamtoghon tiom ve uluul di. Tovenen uŋgin ghou naneep pooi. Leso matag kisin ataam to yom ughuri payei, ve nataghoni irau sawa isob. Ataam tonenen, taum avom isavia.

⁸⁹O Yoova, saveeŋ tiom pale iyaryaaŋ izi sambam, ve inepneep tovene itaghoni taghoni gha ila.

⁹⁰Tamtoghon tipopoop, ve papaghu todi tivotvot itaghoni taghoni gha ila. Ve gabuam to avom onoon ve utataghon saveeŋ tiom ne paam. Inepneep tovene itaghoni taghoni gha ila. Yom to ughur taan ineep tuŋia ila ina. Irau induur maau.

⁹¹Muuŋ ve inim aazne, mbeb tisob tineep tuŋia ila inadi inadi itaghon saveeŋ to yom usavia. Ve mbeb tisob tinim mbesooŋa tiom.

⁹²Saveeŋ tiom igham lolog poia le poia kat. Inimale maau, tone pataŋani tiou igham ghou nalaleg.

⁹³Tutuuŋ to yom ughur di, you irau lolog imaagh pa eta maau. Maau le maau kat. Pasa, saveeŋ tiom, tauto igham ghou avuvug ila, ve naneep matag iyaryaar.

⁹⁴You nanim lem wa. Tovenen ugham mulin ghou lak! Pasa, you nazuaria ghou naghaze le nataghon katin tutuuŋ tisob to yom ughur di.

⁹⁵Aazne, ndiran samsamiadi tighamgham lilin ghou tighaze tirab ghou namaat. Eemoghon matag iŋgalŋgal ataam to yom ughuri payei.

⁹⁶You naghita mbeb eta to ivot kat ne maau. Mbeb to naol ne, tisob timuul moghon. Eemoghon tutuuŋ tiom, ghoro iraua kat. Nene pughu tiina, ve poia le poia kat.

⁹⁷You lolog pa saveeŋ tiom kat! Tovenen sawa to naol ne, mboŋmaagh ila le rabrab izi, matag itaghoni ve naghamgham ŋgar pani.

⁹⁸Tutuuŋ tiom ineep ila ŋgar tiou irau sawa isob. Tauto ŋgar tiou ilib pa koiagŋa ŋgar todi.

⁹⁹Ŋgar tiou ilib pa yes ŋgara to tipatoot ghou ne paam. Pasa, matag itaghon ataam to yom ughuri payei, ve naghamgham ŋgar pani.

¹⁰⁰Ve ŋgar tiou ilib pa ndolmana ŋgar todi paam. Pasa, tutuuŋ to yom ughur di, matag kisin di, ve nataghon di irau sawa isob.

¹⁰¹You napaghau taug pa ataam samsamia to naol ne, leso nataghon aliŋam.

¹⁰²You napul murig pa tutuuŋ tiom deŋiadi maau. Pasa, yom taum to upatooŋ ghou pa tutuuŋ tonenen.

¹⁰³Bagil suru, nene poia pa taghuni. Eemoghon saveeŋ tiom, nene poia le poia kat. Ilib pa bagil suru.

¹⁰⁴Tutuuŋ to yom ughur di, nene tiuul ghou pa naghilaal ŋgar poia. Tauto naghur koi pa ŋgar kaarom to naol ne. Pa vene, tiweu ghou ve napul ataam tiom.

¹⁰⁵Saveeŋ tiom, nene inimale lam to isul ataam ve nalaagh. Ve inim ghazooŋa payou, leso nalaagh taghon ataam tiom.

¹⁰⁶Gabizooŋ tiom, nene deŋia moghon. Tauto nambua saveeŋ toman ghom, ve napariaaŋa le iyaryaaŋ kat naghaze you pale nataghon ataam tiom to gabizooŋ mbeb.