Mboe 80:4-16

⁴O Yooba, Anutu tiam. Nu mburom keskeezeŋom. Mi iŋgi ketem malmal piam wal ku, tana leŋleŋ suŋŋana tiam mini som. Ŋiizi na ketem malmalŋana ku imap?

⁵Nu kamam pataŋana ramaki tiŋiizi ma iwe koyam kini. Mi motoyam luluunu isula mbooro biibi ma iwe koyam yok.

⁶Pa iŋgi nu pizil ndemem piam. Tana zin karkari ta timbot kolouŋana na, tiserseere be tikam toono tiam. Mi koyam koi bizin ta boozomen tikamam seŋge piam.

⁷O Anutu, nu mburom keskeezeŋom. Uulu yam ma ambot ambai mini. Swe itum ramaki kampeŋana ku piam, mi kam mat ku ma iyaara piam. Kamke yam.

⁸Muŋgu ke baen ta imbot toono kizin Aikuptu. Mi nu puru, mi kam ma imar lele tiŋgi, to ziiri lele tiŋgi ka tomtom bizin ma tiko papirik, mi paaza ke baen tana su toono kizin.

⁹Mi nu laama ke uunu, bekena indom ma ise ambai. Tana uranuran ikeraama sula kat, mi namannaman irao pa toono biibi ti.

¹⁰Ke baen ku tana isala ma isala kat, ma ilip pizin abal mi iur nerekou pizin. Mi ke bibip pakan timbot la kopo mbarmaana tomini.

¹¹Namannaman pakan tiyaara ma tila pa tai biibi ta imbot lele ta zoŋ izulla pa na. Mi namannaman pakan tiyaara ma tila pa yok biibi Euprates ta imbot zoŋ uunu na.

¹²Mi iŋgi parei ta nu reege siiri ta muŋgu iliu baen lene ku? Re. Zin tomtom ta tiwwa len sorok na, tikemem baen ku ŋonon.

¹³Mi ŋge saŋsaŋŋan tisuzus uranuran, mi buzur saŋsaŋŋan tikanan ŋonon mi tipasansaana.

¹⁴O Anutu, nu mburom keskeezeŋom mi mbotmbot ta saamba a. Motom miili piam. Mar mi urpe ke baen ku ma imbot ambai mini.

¹⁵Pa ke baen tiŋgi na, itum nomom woono ta ipaaza. Mi nu mboro i ma iwe biibi, bekena ipiyooto kom ŋonoono ambaimbaiŋan.

¹⁶Re. Iŋgi kom koi bizin titaara ke baen ku, mi tiur you pa. Tana ketem malmal pizin, mi pambiriizi zin ma tila len!