Mboe 68:12-25

¹²Tiso: “Ou keleŋ! Zin king ziŋan zin malmal kan kizin tiko papirik ma tila len lup kek! Tana toyo mburu kizin mi takam pizin moori kaibiim ta timbot kar na be tiparrai pizin.

¹³Zin tikam koroŋ pakan ta tiurpe ma kembei mbalmbal ruŋgun na. Koroŋ tana ndabokbokŋan kat. Tipakapkap begen pa silba, mi rumun rumun pa gol. Mi parei ta niom pakan kombombooreyom sorok raama zin sipsip men?”

¹⁴Indeeŋe ta Anutu mbura keskeezeŋana iyangwiiri zin king ma tiko pirik na, ikam ma ŋauŋau mi yaŋpat isu pa abal gabgapŋana Zalmon.

¹⁵Niom abal bibip ki Basan, niom zoyomŋoyom mi bibip, mi uteyom izalla ta kor a!

¹⁶Kena parei ta motoyom mburmbur pa abal ta Anutu iroogo pa itunu mi ikam ma iwe lene na? Abal tana, ta Yooba itunu muriini ko imbotmbot pa ma alok.

¹⁷Merere izem abal Sinai, mi iwwa raama karis kini malmal kan ta munŋaana ka tieene, mi tila tipet muriini potomŋana Sion.

¹⁸Mi iyaaru ka koi bizin boozo ta ilip pizin na, ma tito i ma ziŋan tisala abal kini ta kor a. Mi tomtom tikam koroŋ boozomen pini sorok. Mi wal zorzooroŋan tilek kumbun pini, mi tikam le koroŋ tomini. Tana zin tomini, ko ziŋan Yooba Anutu timbotmbot pa muriini tana.

¹⁹Tapakur Merere! Pa aigule ta boozomen, ni iuluulu iti mi ibadbaada pataŋana kiti. Mi ni Anutu ta ikamkewe iti.

²⁰Anutu kiti, ni Anutu ta ikamkewe zin tomtom ma timbot ambai. Merere kiti Yooba, ni itatkewe iti pa meeteŋana.

²¹Anutu ko ipetepaala ka koi bizin uten. Tana zin wal ta titoto zaala sananŋana na, ni ko ipun zin ma timap.

²²Merere iso ta kembei: “Koyom koi bizin ta timbot lele Basan na, nio ko aŋkam zin ma timiili ma timar. Mi zin ta timbot mozo lukutuunu na tomini, nio ko aŋkam zin ma tise.

²³Mi siŋin ko iwe kembei ta karoozo be kawwa la leleene. Mi me tiom ko tiwin siŋin tana.”

²⁴O Anutu, nu ta king tio. Mi nu lip pa malmal kek. Tana mar raama lelem ambai, mi lela urum ku potomŋana, be zin iwal biibi tire u. Nu muuŋgu, mi wal ku tito u ma tilema.

²⁵Zin mboe kan timuuŋgu, to zin tamuriŋ ta tiyelyel kakaaba na timbot lukutuunu, mi zin kombom kan tipa kaimer.