Mboe 44:1-9

¹Mboe kizin Kora Anutu, muŋgu kat nu kamam uraata bibip pa tumbuyam bizin. Tana tiwidit ka mbol, mi imar imar ma niam amleŋ tomini.

²Zin wal ta muŋgu timbotmbot toono tiam Israel na, itum nomom ta iziiri zin ma tila len. Mi nu kam toono kizin ma iwe tumbuyam bizin len be timbotmbot pa. Pa nu koto zin Kanaan kan ma mburan imap kat, mi kampe tumbuyam bizin mi kam zin ma timar timbot ambai su toono tiam.

³Ŋonoono, tumbuyam bizin tikam malmal be tikam toono kizin. Tamen zitun mburan mi buza kizin ikam zin ma tilip na som. Pa nu ur lelem pizin mi lae kizin, mi nomom woono mi mburom ta iporou pizin. Tanata tilip pa kan koi bizin mi tikam toono kizin.

⁴Yooba, nu king tio mi Anutu tio. Mi nu ur sua mbolŋana ta kembei: Niam ta Yakop popoŋana kini na, ko amlip pa koyam koi bizin.

⁵Mi nu gabgaaba yam, tanata amziiri koyam koi bizin ma tila len. Pa ampase pa zom, tanata amlip pizin mi amparaama zin.

⁶Nio ti aŋpase pa peene tio som. Mi buza tio tomini, ina irao be ikamke yo na som.

⁷Nu itum ta uluulu yam mi tatkewe yam pa koyam koi bizin naman. Nu pakankaana zin ma tiko ma tila len raama kan miaŋ.

⁸Tana niyam se pu, mi leleyam ambai pu mi ampakurkur zom totomen.

⁹Tamen koozi na, nu pizil kat ndemem piam, mi gaaba zin malmal kan tiam mini som. Mi zem koyam koi bizin ma tilip piam, tana koyam miaŋ.