Mboe 35:4-13

⁴Yooba, zin wal ta tisombe tipasaana yo na, koto zin ma mburan imap, mi pamiaŋ zin. Mi zin ta timbuuru koŋ na, pakankaana zin, mi kam zin ma tikam pirik ma tila len.

⁵Aŋela ki Yooba ko iziiri zin ma tiko papirik, kembei ta miiri iwilaala koroŋ gubungubun ma ila lene.

⁶Aŋela tana ko iketo zin. Mi zin ko tito zaala ta sipirpirŋana i, mi tiwwa pa zugut lene. Tana ko irao tiko na som.

⁷Pa nio aŋkam ŋoobo zin som. Tamen zin tiur kilis be tikeene yo, mi tikel naala ta isula kat be aŋtop sula.

⁸Yooba, pamorsop zin mi pambiriizi zin ma tila len. Kam kilis kizin ma ikeene zitun. Mi kam zin ma zitun titoptop sula naala kizin ma tisaana kat.

⁹Tonabe nio leleŋ ambai kat pa Yooba, mi menmeen yo pa ulaaŋa kini.

¹⁰Mi aŋso raama mburoŋ, mi ŋgar, mi leleŋ ta kembei: “Yooba, nu lip kat. Nu kadom tomtom sa som. Pa zin wal ta len mburan biibi som na, nu tatkewe zin la wal mburanŋan naman. Mi zin wal sorrokŋan ta kan koi bizin tikototo zin na, nu uluulu zin.”

¹¹Re! Iŋgi tomtom timaŋga mi tiŋgal sua pakaamŋana pio bekena tipasaana yo. Mi sua ta tiwisese yo pa i, na nio aŋute risa som.

¹²Mbulu ambaiŋana ta aŋkamam pizin na, zin tipokotkot pa mbulu sananŋana. Mi timet molo pio, mi tizem yo ma motoŋ monmoondo.

¹³Mi nio, indeeŋe mete ikam zin na, aŋgun muuŋgu, mi aŋgalsek ituŋ pa kini kanŋana mi aŋsuŋ pizin. Tamen suŋŋana tana nu pekel som. Tana leleŋ ipata kat mi aŋtaŋtaŋ pizin, kembei ta zin toŋmatiziŋ tio ŋonoono, som toroŋ bizin. Mi aŋtuntuundu pa pai tio ta boozomen, kembei tomtom ta leleene ipata pa meeteŋana ki naana na.