Mbouŋ To Yes Israela 35:4-13

⁴Yoova, yes tau tighe tirav ghau namaat ne, utatan tapirizi, ve ugham zi mayazi ve tighau tila. Yes tau tiil eez to tivaghamun ghau ne, ugham ŋgar toozi ivaghamgham, ve timuul tila toman mayazi.

⁵Yoova, naghe aŋela tsio inaan zi gha tighawaar, imin yaghur ivuvuur ŋgaupup.

⁶Aŋela tsio tawe igham taghon zi, ve tilaan ila ndoroom loolo taghon eez tau pusukpusukia na, o poi!

⁷Pasaa, yau nagham sosor eta pazi mako. Eemon yes tiraar puugh tighe tisaghav ghau. Ve titai puura tau izila kat, leso natap nazila.

⁸Yoova, upateeŋ zi pa saghatiiŋ tiina eta. Ugham zi tighoon ila tauzi puugh toozi. Ve ugham zi titaptap tizila puura tau titaii payau na. Leso saghatiiŋ igham zi le tisaghat kat!

⁹Yoova, ighe ugham tauvene, ene pale lolog poia kat payo, ve tintinig pa uleeŋ tau ugham payau.

¹⁰Yau aat napait ezam toman lolog, ve naghe: “Yoova, sei ta imin yo? Eta mako! Pasaa, yes tau tapirizi imbool na, yo ugham mulin zi ila yes tau tapirizi tiina na nimazi. Yes mbolaaŋa ve yes tau tileep ila pataŋani loolo na, yo aat uvool toozi, ve ugham mulin zi ila umbuuŋa nimazi.”

¹¹Tamtamon naol tiburig ve tiŋgal saveeŋ karom payau tighe tivaghamun ghau. Eemon saveeŋ ŋgaliiŋ tau tinoknok ghasoniiŋ ghau pani ne, ene yau nakankaan pani.

¹²Yau nagham ŋgar poia pazi. Eemon yes tipamuul ŋgar saghati payau. Tauta lolog ipataŋan kat.

¹³Eemon saawe tau yes timorooŋ le tisaghat, lolog ipataŋan pazi, ve nagharaat taug mako. Ve naŋgun taug pa ghaniiŋ aniiŋ, ve naghur zi ila suŋuuŋ tsiau. Eemon suŋuuŋ tsiau tane, yo ugham anooŋa ivot mako. Tauta lolog ipataŋan kat, ve nataŋ pazi imin zetagŋa, ma toŋvetaz tsiau duduuŋ. Ve nalaagh matag izaa mako. Natudtud ve nataŋtaŋ, imin ŋeer tau loolo ipataŋan pa tiina imaat.