Mboe 132:5-15

⁵ma irao aŋdeeŋe Yooba le lele sa. Pa ŋgar tio imbol be aŋkam Anutu mbolkeŋkeŋŋana ki Yakop le muriini sa be imbot pa.

⁶Indeeŋe niam ambot lele pakaana ki Eparata na, amleŋ Sua Mbukŋana Ka Koror uruunu. Tana amla ma amdeeŋi imbot igarau kar Yar.

⁷To amso: “Tamaŋga mi tala Anutu muriini ta Yerusalem a. To tala tagarau muriini peeze kana, mi telek kumbundu pini ma tapakuri.”

⁸O Yooba, maŋga ramaki Sua Mbukŋana Ka Koror ta iswe mburom na, mi la pa murim.

⁹Patoronŋana ka tomtom bizin ku ko tikam mbulu ndeeŋeŋana totomen. Ko iwe kembei len mburu be tizebzeebe zin pa. Mi zin wal ku ta tiurur lelen pu mi titoto mbulu ku na, kalŋan ko izalla mi tiyotyooto raama menmeen zin.

¹⁰Yooba, motom iŋgal mbesooŋo ku Dabit. Popoŋana kini ta itum roogi mi uri ma iwe king na, pizil ndemem pini pepe.

¹¹Muŋgu Yooba itunu imbuk sua mbolŋana pa Dabit, mi ipombol ma imbol kat. Tana irao ireege sua tana na som. Sua ta kembei: “Popoŋana ku tabe tiyooto pu i, nio ko aŋur kizin tasa ma ikelu be imbot se murim peeze kana.

¹²Mi sombe lutum bizin matan iŋgalŋgal sua tio mbukŋana mi titoto kat ka tutu, tona lutun bizin tomini kadoono ko tikam murim, mi timbutultul su murim peeze kana, mi iseeŋge iseeŋge ma ila. Tutu tana, nio ituŋ ko aŋpaute zin pa.”

¹³Yooba iroogo kar Sion, mi ikam ma iwe lene kek. Lele tana, ta ni leleene be imbotmbot pa.

¹⁴Tana iso ta kembei: “Lele ti ko iwe muriŋ be aŋbotmbot pa ma alok. Nio leleŋ be muriŋ peeze kana imbotmbot lele ta ti.”

¹⁵Nio ko aŋpombol zin Sion kan, mi aŋkampe zin ma tirao kat pa koroŋ ta boozomen. Tana zin wal ki Sion ta petel zin ma timbot ŋoobo na, nio ko aŋputu zin ma kopon bok.