Matyu 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Dokopa Patasipi Satyusipi mendapuame Jisasa kateasa ipupala baa minao makande pyoo baame kaitinya-tae kongali mende kandamana pina leami.

²Dopa leaminoaka doko, baame dokaitanya pii yanu pyao, “Yuu kualanya kone yuu pumbuti yuu pilyamopa nyakamame, ‘Kaiti kate pilyamona, paina pyaapome lamo,’ lengema.

³Dee yuu yongalanya puli ita waiyepae paelyamopa nyakamame, ‘Kaiti iminjeta kate pyata pilyamona, aiyuu ipapome lamo,’ lengema. Nyakamame kaiti doko kandatala opa pyaapome lamo apa pyaapome lamo lao yapengemaka doko, indupa gii dakepa kongali dupa nyakamame yapapenge nanjilyape?

⁴Endakali indupa palelyamino dupame Gote yakinenge kooma lamo! Nyakamame kongali mende kandamana lelyaminoaka doko, nambame kongali mende pyakala nayatoo. Goteme akali Jonaa-kisa kongali piamo dokoaka makande petae setana,” lea. Dopa latala baame dupa yakinatala pea.

⁵Dokopa disaipele dupame endaki pete dokonya yangitena paanya betesa kame setala peami-pyaa.

⁶Dokopa Jisasame dokaita lamaiyoo, “Kandeleno! Nyakamame Patasipi Satyusipi dupanya iisa dupame nyakama koyasetamina wandyuu kalyepape!” lea.

⁷Dopa leamopa dupame nyakama betesa nasiamo tenge dokonya nyakamalapo leami.

⁸Dopa leamino doko Jisasame kandatala dokaita lamaiyoo, “Nyakama kuki masoo miningi dupame, aipuma betesa nasilyamo lao nyakamalapo mende lamai-lamai pilyamipi?

⁹Nyakamame masetala naelyamipi? Nambame betesa yuungi akali taosene yuungi dupanya konjakamaiyo doko kame silyamipi? Dopa piopa kakana siamo dupa nyakamame baseketa mandi akipatenya mandyuu tumbasiamipi?

¹⁰Dee nambame betesa kalange akali taosene kitomende dupanya konjakamaiyo dokopa kakana siamo dupa nyakamame baseketa mandi akipatenya mandyuu tumbasiamipi?

¹¹Nambame betesanya lao nalalo doko, aipa petala nyakamame masala naelyamipi? Patasipi Satyusipi dupanya iisa dupame nyakama koyasetamina kandao kalyepape lalona,” lea.

¹²Dokopa betesanya palyingi iisa doko kandao laa nayao Patasipi Satyusipi dupame mana lamaingi iisa jepae dupanya kandao kalyepape lalame lamona lao disaipele dupame masiami.

¹³Jisasa baa yuu taono Sisatia Pilipae-tena pea. Pupala baanya disaipele dupa pisoo, “Endakali dupame Endakalinya Ikiningi doko kandao apina lengemape?” lea.

¹⁴Dupame yanu pyao, “Yangimi emba kandao Jone Kaimbu Pingi dokona, yangimi Ilainjana, yangimi Jetemaya tamopi potopesa waka dupanya mende tamopina lengemana,” leami.

¹⁵Jisasame dokaita lamaiyoo, “Dopaka doko, nyakamame namba kandao apina lengemape?” lea.

¹⁶Dokopa Saimone Pitame baa kandao, “Emba Kataisa Gote saka katenge dokonya Ikiningi dokona,” lea.

¹⁷Dopa leamopa Jisasame baa lamaiyoo, “Saimone, Jone ikiningi, emba mona yaepasetae. Doko embame pii kiningi leleno dake endakali mendeme langya naya. Daa. Nambanya Takange kaitinya katenge dokome emba-kisa panasia.

¹⁸Nambame emba kandao dapa langilyoaka: Pita, emba kana yangapae kyoto. Kana yangapae doko-kisa nambame nambanya sosa doko sakatasoto. Yuu koo dokonya pupu lapae dokome sosa doko nyoo isa palyala nayata.

¹⁹Nambame Kaitinya Katenge dokome isingi dokonya kii dupa emba dito. Embame isa yuu dakenya mende pyakilyina kayakamaitino doko, kaitinya pyakilyina kayakamaitaka. Embame isa yuu dakenya mende yukuokamaitino doko, kaitinya yukuokamaitakana,” lea.

²⁰Dopa latala baame disaipele dupa kyoto joo lamaiyoo, “Namba Kataisa dokona lao mendaipi mende lamaiya nayalapape!” lea.

²¹Gii dokopa pituu Jisasame baanya disaipele dupa panao dapa lamaiya: “Namba Jetusaleme pupenge. Patopa isingi akalipi, pitisa mupapi, mana setapae masingi akalipi dupame tanda longo ditala namba pyao kumasetataminopa kote teponya Goteme dee sakatasetana,” lea.

²²Dopa leamopa Pitame Jisasa laminao umbisale pupala pyalanya lao, “Kamongo, emba dopa etete napina! Goteme emba kondo kaenana!” lea.

²³Dopa lao pyalanya leamopa Jisasame kandapilyetala Pita lamaiyoo, “Satane, emba nao puu! Embame namba koo pyaale lao makande pilino. Embame Gotenya masingi doko masala naenya, endakalinya masingi doko masilinona,” lea.

²⁴Dokopa Jisasame baanya disaipele dupa lamaiyoo, “Endakali mendeme namba watao payatoo lao masetamo kandao doko, baame baa tange kame setala baanya ita poko doko nyoo soo namba watao paena.

²⁵Endakali mendeme baa tange isoo auu pyoo katapu laka lao masetamo kandao doko, baa alu pita. Dopaka doko, endakali mendeme namba lao masetala baa tange kame setamo kandao doko, baa auu pyoo katata.

²⁶Doko, endakali mendeme yuunya oapi dupa pitaka nyoo setao katapala baa koyatamo kandao doko, oapi dupa pitakame aipa petala baa nisetape? Dee aki mendeme baa tange kii tamao nyepengepe?

²⁷Endakalinya Ikiningi doko baanya enjele dupa-pipa baanya Takangenya tii pipae doko tambetambe kapa pao ipata. Ipupala endakali mendai mendai lao dupame mana minataminoli pyoo yanu pyata.

²⁸Nambame nyakama kiningi langilyona, endakali ae kalyamino datupanya mendapua kumapala nayataminopa Endakalinya Ikiningi dokome kiŋi joo isala ipatamo gii doko kandatamina,” Jisasame dopa lea.