Mark 9:3-39

³Kata kana gara i poepoe saki ba mata kamokamosina, kega kesana kotoi dobu ai kana gara ita bosuwei wai nanakasike.

⁴Ba kona maranai Elijah ba Moses si rerematara ba Iesu yabata si bisisiya wai si kinanisi.

⁵Ba Peter Iesu kurina i wona, “Bibeyebeyena biyim, i gaire saki kata yakai nina, ke wona kata guguba tonu kana bowaisi, kesana kom kairavim, ba kesana Moses ba kesana Elijah kairavina.”

⁶Kosi si nagara saki kairavina kega i kuiri awaika iti sisiyei.

⁷Damanina ba guba i botu ba i waku tawanisi, ba guba kamonai gamo si nonori. “Nikona natuku, au nuwayauyauna. Koi tina bainegei!”

⁸Ba yagigagina wata si kita nanaga wai, kega kotoi si kinani, saba Iesu ikesina wata nai i mamana.

⁹Ba koya si gaigakirei maranai Iesu i kaotunetuneyisi, kata awaika si kitai wai kega kesana kotoi sita wonei, yepo Sebare Natuna rabobo ai ita bomsiri.

¹⁰Kata niko wose ikesisi nuwa sinesi yai si unatawana ba si bidimeyanei kata rabobo ai ina bomsiri wai basuna awaika.

¹¹Ba kosi si toirubai, “Awaika kairavina bibeyebeyena biyisi si wona kata Elijah ina kai botu?”

¹²Iesu i kaobeya, “Bisuwona kata Elijah ina botu kainaona kata, awaika ereonowana ina bobunagi. Saba, awaika kairavina wona i tamo kiruma kata Sebare Natuna ina paiwara saki ba sini sinikikiyei?

¹³Saba ana wonimi, Elijah i botu, ba matapa pipiya awaika si wiwainei wai kurina si wosei. Kona kairavina wona i tamo kiruma wai nanakasike.”

¹⁴Maranai si botu ana nonorayauna mutusi kurisi wai, koroto kaikapona si gwagwarisi, ba kairuwana bibeyebeyena biyisi yabata si bikawapata wai si kinanisi.

¹⁵Ba maranai pipiya ereonowasi, Iesu si kinani wai si sikwanei ba si verabeyei.

¹⁶Ba ana nonorayauna i toirubaisi, “Komi awaika nokosi pipiya yabata ko bikawapatei?”

¹⁷Ba sebare kesana koroto kamonai, i kaobeya, “Bibeyebeyena biyim, natuku sebareikei kanuma goyona kamonai e mamana ba i wosei kata kega e bisisiya, wai a botuwei kurim.

¹⁸Maranai e botupeni wai, e bigarui ku tano, ba kawa puropurona e kasikasibau, ba nibona e bikutakikisi, ba yebo e patopatokai. Am nonorayauna ai babaisi kata kanuma goyona siti kasibauni saba kosi si wose kabai.”

¹⁹Iesu i kaobeyei i wona, “Abi pipiya naki, nota kabakabami! Mara biyamo yabata ta mana, ba yebo mara biyamo ani beyimi? Sebareikei ko botuwei kuriku.”

²⁰Kata si botuwei kurina. Ba maranai kanuma goyona Iesu i kinani wai, yagiyagina wata sebareikei i gusui ba i garui i peku ku tano ba i bikamtabitabiri ba kawa puropuro si kasibau.

²¹Iesu sebareikei tamana i toirubai i wona, “Mara awaika nikona i dagui?” Ba tamana i kaobeyei, “Yogiyoginai i dagui.

²²Ba mara pesarisi i garu ku keyama karakarasina ba ku okowa kasibunuina kairavina. Saba kom rubana wai ki kamyosukuvikai, ba ki baisikai.”

²³Iesu i wona, “Eee! Kom kuni geruwana wai, kairavina kotoi wata e bigeruwana wai awaika ereonowana kurina damanina wata.”

²⁴Saba tamana yagiyagina wata i para i wona, “A bigeruwana! Saba ki baisiku kata au bigeruwana ina rakata.”

²⁵Ba maranai Iesu koroto i kinanisi si veravera kurina wai, kanuma goyona i kaotunei, “Kom taina pota ba kawa pota kanumina a kaotunetuneyim, ke kasibau taveyei ba kega meyana kuna riuna meyei.”

²⁶Kata kanuma goyona i rasa goyogoyo, i rugusugusu sakiyei ba i kasibau taveyei. Kata sebareikei kana kinana bage ita rabobo, wai pipiya si wona, “Kata kona wai i rabobo.”

²⁷Saba Iesu yarona i yauni ba i baisi i taina bimimsiri.

²⁸Iesu i riu ku yove kamona murinai ana nonorayauna ikesisi si toirubai si wona, “Awaika kairavina yakai kanuma goyona kega rubana kati kasibauni?”

²⁹Saba kona i kaobeya, “Pari yai wata nikosi kanuma sina kasibau.”

³⁰Kata Iesu ana nonorayauna yabata nao kupura si kasibau taveyei ba Galilee yai wata si nae. Iesu kega ana waina kotoi ita kuirisi kata kosi wai memena,

³¹kairavina kona ana nonorayauna i bibeyebeyisi i wonewonisi, kata Sebare Natuna pipiya goyogoyosi ku yarosi sina terei ba kosi sina kasibunui, ba kao tonu murinai ina bomsiri mena.

³²Saba kosi ana sisiya basuna kega si kuiri, ba si nagara wai kega si toiruba.

³³Ba kosi si botu ku Capernaum ba yove kamonai i mamana maranai ana nonorayauna i toirubaisi, “Komi keta dobonai awaika ko bikawapatei?”

³⁴Saba kosi kega si kaobeyei, kairavina kosi keta dobonai si bikawapata, kata kamosi yai kotoi i gae saki.

³⁵Ba Iesu i makira ba asi 12 i yorisi kurina, ba i wona, “Kotoi wata ana waina ini nao wai, ini muri potapota ba ereonowasi kairavisi ina bosaibira.”

³⁶Ba pipiyaikei i yauni naosi yai ibo bimsiriyei, i tararausi ba kurisi i wona,

³⁷“Kotoi wata nikosi pipiya gunaguna kesana kau wabai ini naovei wai, yauku e binaoviku. Ba kotoi wata e bienoenowiku wai, kega yauku ikesiku wata e bienoenowiku, saba kotoi i poraiku wai kona e bienoenowei.”

³⁸Saba John i wona, “Bibeyebeyena biyim, yakai sebare kesana kam wabai kanuma goyosi i bikasibauwana wai ka kitai, ba ka wonei kata ita boterei kairavina kona kega kamoti yai.”

³⁹Ba Iesu i wona, “Kega koni gesei kairavina, kega kesana kotoi kau wabai kiyakiyaya ina wosei ba yebo muri yai ina kaobigoyoniku.