30Kwertengerl Jesus ikwerenh-rnem Jesus ikwer-warl apetyek. Rernem ilelhek rernemarl akalty-anthek apmer arrpanenhek, mwerr-angkwarr apmer arrpanenhek anetyek Akngey-kenh-angkwarr.
31Akngerr Jesus ikwer-warl apetyek. Kwertengerl ikwerenh-rnem-akert Jesus renh amern arlkweyangilek akngerrel. Jesus angkek kwertengerl ikwerenh-rnemek, “Mpa, anwantherr alhey, apmer ingwer-warl, ikwer-rnem-kety!”
32Nganerl-alhek rtnwewarl, rernem kwaty ilkwangkwarr artarnpenhek artempel ingwer-warl.
33Ingwerel-rnem renh-rnem iterl-arek apmer ingwer-warlarl rernem artarnpenhek kwaty ilkwangkwarr, rtnwel. Kwaty ilkwa anper-alhemel, rernem alhek ikwer-rnem-warl.
34Akngerr Jesus ikwer-warl akarrirrek. Ra renh-rnem akalty-anthek, atwerrpek-atwety.
35Kwertengerl ikwerenhel-rnem Jesus renh ilek, “Ingwer-rneman thwena tawen-rnem-warl, amern ikwerenh-rnem-kenh ineyek, atwerrpirrekerrem.
36Amern-wenyarl nhanyeman, arrangkwarl. Atwerrpirrekerr-awaty renh-rnem thwena!”
37Jesus angkek, “Arrantherr wantenherr-arey.” Rernem ywarn iterrek, rarl Jesus-el renh-rnem ilek. Rernem angkek, “Man akelyarl nthakenh amern ineyang artwa akngerrek.”
38Jesus angkek, “Amern aretyek alhenherr-arey akngerrek.” Rernemap amernek nthwerl-apenh. Rernem Jesus renh ilek, “Aker irrpeng atherr, amern irrpetyap.”
39Jesus-el ilek kwertengerl ikwerenh-rnem, rernem iletyek akngerr arrernelhetyek ingkerrenh atherrk-warl.
40Ingkerrenh rernem arrernelhek amentew-ament.
41Aker irrpeng-atherr amern irrpetyap Jesus-el inek. Ra Ingkart Akngey-warl angkek inkwerelhemel, ra amern akngerr anthetyek, aker irrpeng akngerr anthetyek. Jesus-el amern rlweth-akek. Ra kwertengerl ikwerenh-rnem anthek, rernem-anem antheynetyek ingwer-rnem. Jesus-el aker irrpeng rlweth-akek. Ra anthek kwertengerl ikwerenh-rnem rernem antheynetyek ingwer-rnem.
Mark 6
Mark 6:30-41