Mantá Tanla 23:23-33

²³Junsi coroneli paluca capitanlaca jasa carito, itsantinue: —Soldadolaca seisa carilaquede! tinue. Nula Cesarea puebloca jilaichunae. Palu patsa espadachi quicaamin soldadolabe, siete chunca calubi chudimin soldadolabe, palu patsa lansachi quicaamin soldadolabeca tanjinola joe tinue. Nuebe de la nochete jilaina! tinue.

²⁴Aman Páblochi tenchinan calu manca sede! tinue yape yanan pechudito jisa. Junto Pábloca Félix tinun cobernadorichi fecári seque tanjino podeilaichunae tinue.

²⁵Junto coroneli tsantisi, pila quinue. Capitanlabe peerechun, itsanque pila quinue:

²⁶Mantamin Félix cobernadori, la Claudio Lisias nuchi saludo erenayoe.

²⁷In pilaca erenato, doramin tsachi Pablo mumunca peerenayoe. Israelítala yaca sonba inato cato, totechinaminlanue. Junnasa Páblocari romano siudadano joeque miiyoe. Junto soldadolabe jito yaca josoleyoe yape totelaquitusa.

²⁸Yaca josoleto, miino munaramanyoe ti quichun yaca totechi latinanunca. Junca miichun Pábloca israelita mantaminlachica tanjiyoe.

²⁹Junni yalachi mantá chutecabe culpa quinaminlanue. Tsanlaquinanan, yaca natiya toteno itominue. Dononan itominue. Aman Pábloca tsanque miiyoe.

³⁰Junnasa tsachi manca labe cuenta quee israelítalari Pábloca nosa totechi latinaeque. Aman junca miisi, yaca nuchica wewe erenayoe. Junni yaca culpa quiminlaca nuchica jisa mantaquechinayoe Pablo niyaque culpa tanunca manpabi. Tsanqueri pano joyoe.

³¹Junni coroneli tsanque pila quinunsi, soldadolari yachi mantate jilainue. Jun quepente Pábloca Antípatris pueblo fecári tanjilainue.

³²Junsi ayuna nanchiri caluchi jimin soldadolasiri Pábloca catanjilainue. Weyanlari cuartelica manjalainue.

³³Junni Cesarea pueblobi féto, Pábloca cobernadorichi cuwapolaquinue pilabele.